امير : يعني انا بقالي ساعة بندهلك ولا انت هنا وهوة من كلمة واحدة رديت عليه وسبت فقرة الاعلانات اللي قبل الحلم؟ ... ما علينا
فادي : ابدأ ؟
عادل : اتفضل
فادي : ديه اول قاعة وهية القاعة الرئيسية وبنشوف فيها هنا لوحة " قلع عين شمشون "
ولوحة " داوود وجليات " و لوحة " طرد ادم وحوة من الجنة "
امير : وايه ده؟
فادي : ده ؟ ده " خاتم الملك " ويعتبر من اهم الحجات اللي هنا في المتحف لأنه خاتم المُلك .. وده من الذهب الخالص ويعتبر غالي جدا
مارتينا: واو ده وهمي
فادي : بيقولوا ان عقاب اي حد هايخده هايكون قاسي قوي
وحيد : هايكون عقابه ايه ؟
فادي : هايكون عقابه ... الموت
امل : الموت ؟؟
مارتينا: واااو
فادي : في المتحف ده من حققكوا تعملوا اي حاجة ماعدا انكوا تلمسوا الخاتم ده اوتقربوا من التمثال اللي هناك ده
امل : هوة تمثال مين ده؟
سارة : اه بتاع مين ده
امير : هاتموتوا وتعرفوا؟
امل : اه الفضول هاياكلنا
امير : خليه ياكلكوا يمكن ياكل لسان سارة وتبطل اللوك لوك بتاعها
سارة : الله بقي ياأ/امير
امير : استاذ؟ هوة بقي فيها استاذ؟ مانا ذيي ذيوكم هنا اهوه
فادي : التمثال ده يبقي تمثال " ابليس "
عادل : وده ايه حكايته ؟
فادي : ده كان خادم من خدام الملك وغروره خلاه يفتكر انه ممكن يبقي مكان الملك وعمل انقلاب فطرده الملك هوة وانصاره وبقي ذي قطاع الطرق .. موت كتير وسرق كتير وبقي ليه اتباع كتير قوي لدرجة انهم سموه ملك الشر
امل : ايه ده انا خايفة قوي
فادي : ودلوقتي تعالوا اوريكم بقيت القاعات
(يخرج الكل ماعدا وحيد فيرجع له سامح )
سامح : وحيد ( ينظر وحيد للقيلادة ) وحيد اوعي تكون بتفكر.... لا ياوحيد ارجوك
وحيد : لا ليه ؟
سامح : انت مسمعتش هوة قال ايه ؟
وحيد : طبعا سمعت خاتم الملك وغالي جدا يعني ناخدها ونبيعها وشوف هانعيش ازاي هانعيش زي الملوك يا سامح
سامح : انت ده كل اللي سمعته ؟ انت بتفكر ازاي ؟ انت ماسمعتوش وهوة بيقول ان عقاب اللي هايسرقها هوة الموت ؟ وهلاك الكل ؟
وحيد : سمعت بس تفتكر ان الكلام ده صح ؟
سامح : اكيد صح امال هايكذب عالينا ليه ؟ ارجوك بلاش .. لو مش هامك نفسك فكر في الناس اللي معانا دول .. ذنبهم ايه يضيعوا بسببك ؟ خاف عليهم
وحيد : ناس؟؟ ناس مين ؟ من امتي وانا ليا علاقة بيهم ولا من امتي وهما بيهتموا بيا ولا بيحسوا بيا ؟.. انا من يوم لما عرفتهم وانا مش عارف انسجم معاهم حاسس انهم كلهم جروبات وشلل مقفلة علي بعض ومش عايزين حد زيادة عليهم .. وكل واحد منهم بيبصلي باستحقار اكيد علشان افقر منهم
سامح : يا وحيد ماتبصلهاش بالطريقة ديه ماانا اخوك اهوه وبيتعاملوا معايا عادي
وحيد : ماتحاولش ترجعني انا خلاص اخدت قراري
سامح : تعالة ياوحيد تعالة ربنا يهديك تعالة احسن هانتوه منهم
وحيد : هاجي دلوقتي لكن راجع تاني .. راجعلك وهاتكون ملكي وهغتني ومش هايهمني حد من الناس اللي بيستحكروني دول وهدوس عليهم كلهم كلهم كلهممم
( ستار )
المشهد الثاني
( يفتح الستار علي منظر القصر وامل وسارة واقفين )
امل : اخيرا اتفرجنا علي المتحف كله ... بس بجد عاجبني قوي ان المكان كله منور علشان بخاف من الضلمة
سارة : انتي في ايه اصلا مابتخافيش منه ؟
امل : بجد مش عارفة كل حاجة بخاف منها مفيش حاجة مش بتخوفني بخاف من اهلي ومن المدرسين والدكاترة بخاف من الموت والضلمة بخاف من التماثيل والناس مبقاش عندي ثقة في نفسي او في اي حد حتي في المسرح بخاف وانا طالعة علي خشبة المسرح حتي في توزيع الادوار بكون شايفة مارتينا واثقة من نفسها لكن انا بكون خايفة اني ماخدش حتي دور كومبارس
سارة : طبعا لازم تكون واثقة انها هاتاخد دور ودور بطولة كمان مش اي دور
امل : انتي بتقولي ليه كدا ؟
سارة : اصلك متعرفيش بقالي فترة بشوفها بتقف مع المخرج وعلي طول معاه وياعاليم بقي في ايه بنهم
امل : انتي متأكدة من الكلام ده ؟
سارة : طبعا ده انا شيفاهم بنفسي... اسكتي اسكتي احسن دول جايين
(يدخل شادي وبعد لما يعدي يبص علي التمثال و يرجعله )
امل : دلوقتي بس انا عرفت جابت الثقة اللي فيها منين
شادي : بقي ده موت ناس كتير .. ده انا ممكن افعصه بايدي .. كان نفسي تكون حي قدامي علشان اتحداك وأواري الناس كلهم انك ضعيف جدا
( تدخل مارتينا )
مارتينا: انت بتكلم نفسك ولا ايه ياشادي؟
شادي : لا طبعا كنت بكلم التمثال ... ابليس .. ملك الشر
مارتينا: يالهوي .. انت اتجننت ؟ انا بقول تطلع تنام احسن
شادي : مش لما نعرف مكان الأواض فين الاول ؟
عادل : (صوت ) يلا بسرعة ومش عايز صوت
( يدخل الكل )
شادي : يوووووووه ياعم من غير الزعيق بتاعك ده احسن بنخاف
فادي : طيب ياجماعة انا شايف انكوا خلاص تعبتوا وعايزين تناموا
مارتينا: اه ده انا خلاص رجلي اتكسرت مش متعودة علي كدة
امير : هوة خلاص كده مفيش حاجة هانشوفها تاني في المتحف؟
فادي : في حاجة مهمة جدأ هية عبارة عن سلاح بيحمي من اي شر .. ناس كتير عرفينه لكن بينسوه ويسيبوه في المخزن .. بس ساعات بيفتكروه في وقت الحروب تعالوا اوريهولكوا
وحيد : عايز اناااااااااااااام
عادل : خلاص خليها بعدين يا أ/فادي ... يلا ياجماعة أ/ فادي هايوريكم مكان الأوض
( يخرج الكل وبعدها بشوية يدخل شخص يلبس اسود ومغطي وشه .. ينظر للخاتم .. يمسك الخاتم الانوار تطفي والباب يتقفل )
الشخص : هااه ( استغراب وخوف )
ابليس: هاهاهاها
( يسمع الصوت فيطلع يجري ) ( تدخل سارة وامل في الظلام )
امل : هوة في ايه ؟ ايه صوت الضحكة العالية ديه ؟ المكان مكانش ضلمة كدة اكيد في حاجة حصلت وفين بتوع الامن؟ اااااااااااااه ( صويت )
( يدخل الكل ماعدا وحيد )
شادي : في ايه ؟
مارتينا: ايه اللي حصل ؟
عادل : ايه الصوت العالي ده ؟
( يضاء النور فجأة وامل واقعة علي الارض وجنبها سارة لابسة اسود وتتخض اول لما تشوفهم وتبتدي تتلغبط في الكلام)
سارة : امل امل .. فوقي يا امل
فادي : امل اني كويسة ؟
سارة : ديه مابتنطقش .. اتصرفوا أ/امير اتصرف
امير : وانا مالي... خالوا أ/عادل يبقي يتصرف
عادل : انا عايز اعرف ايه اللي حصل بالظبط
سارة : احنا سمعنا صوت ضحكة عالية قوي .. واحنا ماكناش عارفين ننام فاقمنا نشوف مين ده اللي لسة صاحي وبيضحك كدة ... لاقينا ضلمة في المكان كله وفي وسط الضلمة ديه شوفنا.....
شادي : شوفتوا ايه؟
سارة : شوفنا راس التمثال اتحركت وبصت علينا ورجعت مكانها تاني
عادل : نعم ؟؟ راس التمثال بتتحرك ؟ انتي هاتهرجي ؟
شادي : سيبك منها ديه كذابة ياعم والكل عارف كدة
سارة : صدقوني اتحركت صدقوني والله اتحركت
شادي : قال للحرامي احلف
عادل : كمان بتكذبي ؟ .. اكيد انتي اللي عملتي فيها حاجة ؟؟ مفيش اي دكتور قريب يا أ/فادي؟ أ/فادي ..(ميردش وباصص علي الخاتم ) أ/فادي؟
(يبص الكل علي الخاتم فجأة)
مارتينا: الخاتم !!
عادل : دلوقتي بقي واضح قوي اللي حصل ... حاولتي تسرقي الخاتم ولما شافتك حاولتي تقتليها
(يسبهم فادي ويمشي في حزن فينظر الكل لسارة )
سارة : لأ ماحصلش صدقوني لأ مش انا وراس التمثال اتحركت بجد
امير : انتي يا ترجعي السلسلة ياهانبلغ البوليس
فادي : ماحدش يبلغ
سارة : انا مسرقتش حاجة يا أ/فادي صدقني
فادي : مصدقق يابنتي
( يخرج في حزن )
شادي : يعني ايه اللي قاله الراجل ده دلوقتي؟
مارتينا: يعني التمثال بيتحرك بجد ؟
عادل : ده مش ممكن .. انا لا يمكن اقتنع بالكلام ده .. فادي طول عمره بيهدي الامور .. اكيد هية اللي سرقته ( يشاور علي سارة )
سارة : صدقوني اتحرك
شادي : انا هاكسر التمثال ده ( يجري علي التمثال فيلحقة سامح )
سامح : اعقل يا شادي أ/فادي قالنا منقربش منه ... وكمان ماهي باينة اهيه مين الي سرق
(ينزل سامح )
وحيد: ايه ياجماعة في ايه ؟ صوتكوا عالي مش عارف انام
عادل : في ايه ؟! طبعا ماانت نايم .. الخاتم اتسرق ياأستاد... واتسرق واحنا في المتحف ومكنش في حد غيرنا هنا
شادي : قصدك ايه ؟
عادل : انت عارف قصدي كويس
شادي : وانا ماسمحلكش انك توجه اتهام ذي ده لاي واحد منا
عادل : اللي سرق الخاتم يطلعه
وحيد : خاتم ايه اللي اتسرق ؟
امير : خاتم الملك
(تبدأ تفوق امل )
وحيد : ايه ؟ امتي ؟ وازاي ؟ ومين اللي سرقه ؟ ( باستغراب )
امير : لسة مش عارفين اي حاجة
امل : اااه
سارة : امل كويس انك ابتديتي تفوقي
عادل : الخاتم ده اللي سرقه واحد مننا .. ولازم قبل بكرة الخاتم ده اللي يرجع او هاتكون ديه نهايتنا كلنا .. انتوا فهمين ؟ .. يلا كل واحد علي اودته ومش عايز اشوف اي حد هنا .. ولغاية لما نعرف فين الخاتم انتي المسؤولة عن سرقته ( ينظر لسارة )
( ظلام )
الثلاثاء يوليو 22, 2014 2:36 pm من طرف صليب012
