مسرحية أنت فين يا ادم ( هدية لكل عشاق المسرح )

مسرحية أنت فين يا ادم
رؤية مسرحية من تأليف وإخراج/ جميل منصور
تفتح الستار الأول بينما الستار الثانى
مغلقا ببانوراما سوداء
الصوت ( من داخل الكواليس) أدم أدم أين أنت
أدم ( من وراء الكواليس) ســمعت صوتك فى الجنه فخشيت .. لأننى عريانا فاختبأت .
الصوت هل أكلت من الشجرة التى أوصيتك ألا تأكل منها
أدم المرأة التى جعلتها معى .. هى أعطتنى من الشجرة فأكلت.. المرأة هى التى أغوتنى .
الصوت لأنك سمعت لقول امرأتك وأكلت من الشجرة التى أوصيتك لا تأكل منها .. ملعونه
الأرض بسببك .. بالتعب تأكل كل أيام حياتك .. هوذا الإنسان قد صار كواحد منا
عارفا الخير والشر
( يخرج أدم من وسط البانوراما السوداء مندفعا على
الأرض فى وسط المسرح . ويظهر الشيطان من اليسار
الشيطان أدم أدم .. رايح فين .. أنا وراك والزمن طويل .. أنا كنت عايش فى الجنه
متهنى ..بسبب طفاستك يا أدم بقى ده
حالى .. معلهش .. حاتروح منى فين ياأدم ..
( نور يملأ أرجاء المسرح ويظهر الملاك نازلا من أعلى )
الملاك ما تخافش يا أدم ., أنا حارسك الأمين .. دايما حا تلاقينى جنبك .. أحميك .
الشيطان حا تحميه من أيه ولا أيه
الملاك حا أحميه منك ومن ألاعيبك ..
الشيطان مش حا تقدر .. لأننى عندى سلطان على الإنسان.. عندى شياطين فى كل
مكان ..ومش حا أسيبك يا أدم .
أدم مش كفاية طلعت من الجنه
الشيطان لا مش كفاية .. لازم تكون تحت طوعى .
أدم أنت عايز منى ايه
الشيطان كثير ما تستعجلش .. بنا زمن كبير
الملاك ما تحاولش
الشيطان وليه ما أحاولش .. هو أنا ورايا أيه .. لازم أخذ أدم معايا .. لازم حد يعيش هنا
معايا.. أمال يعنى أعيش هنا لوحدى
الملاك أنت اللى أختارت
الشيطان وماله .. خلاص .. زى ما أنا أختارت .. سيب أدم كمان يختار .. هو مش أكل من
الشجرة وعرف الخير من الشر .. خلاص سيبه يختار بنفسه اللى هو عايزه
الملاك أدم عايز اللى يوعيه ويرشده
الشيطان أدم برضه عايز اللى يسعده ويهنيه
الملاك أدم نفسه يرجع تانى للحضن السماوى
الشيطان أدم نفسه برضه يحضن الدنيا وحلاوتها .. وأنا حا أديله كل اللى يتمناه .. أنا معايا
كل مفاتيح مباهج الحياة .
الملاك كل مفاتيحك هلاك ودمار
الشطان ما قلنا سيبه هو يختار .. الجنه ولا النار
الملاك يبقى لازم نفهمه الجنه فيها أيه
الشيطان ما كان فيها وعارف .. فاضل بقى نعرفه الدنيا فيها أيه
الملاك أنت عارف أن الدنيا عناء وشقاء وعذاب
الشيطان أنا حا أخليله الدنيا سعادة وملذات وشهوات مالهاش حدود حا أوفره كل اللى يتمناه
أدم ( يقف ) خلاص كفايه .. حرام عليكم .. أنا تعبت .. سيبونى أختار بنفسى
الملاك حا تقدر يا أدم تميز بين الخير والشر
أدم حا أحاول
الشيطان حا تحاول أزاى ., وأنا الشر حا أخلهولك خير تتمناه
الملاك حاسب يا أدم
أدم ياريت تسيبونى أختار
الشيطان أهه كده أحلى كلام .. يتقال منك يا أدم
أدم أنت عندك أيه ممكن تقدمهولى
الشيطان ياه .. بس أنت تطلب .. تتمنى .. تتخيل .. ده أنا عندى حاجات ما تخطرش على
بالك يا أدم
أدم فهمنى قوللى وعينى
الشيطان غالى والطلب رخيص .. مثلا الكبرياء .. حا يخليك فوق .. فوق الجميع .عظمه..
آبهه .. دايما رأسك مرفوعه
أدم ياه .. فوق الجميع .. وأيه ثانى عندك
الشيطان الطمع .. حا أخليك أغنى واحد فى الدنيا.. مال .. جاه . سلطان .. نفوذ ..
أدم فى ثانى ولا خلاص
الشيطان أنت مستعجل ليه يا أدم .. وأنت عندى حاأديلك كل حاجه .. حا ألبيلك كل
طلباتك مافيش حاجه عندى مستحيل
أدم كل ده علشانى .. علشانى أنا .. طب ليه أنا بالذات
الشيطان لأنك تستاهل يا أدم .. لانك بتسمع الكلام

أدم وكل ده بدون مقابل
الشيطان لا .. بشروط بسيطه خالص
أدم شروط
الملاك طبعا شروط وطلبات مالهاش حدود
أدم ممكن أعرفها
الشيطان ما تستعجلش بعدين حا نعرفك كل حاجه
الملاك وليه ما يعرفهاش من دلوقتى
الشيطان كل شىء بوقته
أدم لا .. أنا عايز أعرف مطلوب منى أيه علشان تدينى كل ده
الملاك علشان يديلك كل ده .. لازم تضحى بالغالى والنفيس .. لازم تكره أخوك الإنسان .. لازم
تكون أنانى .. حسود .. طماع . جشع .. حايجعلك تدنس هياكل خالقك .. حا
يخليك مش إنسان .. مش إنسان .. مش إنسان .
الشيطان أظن أدم عارف كل حاجه .. بلاش تأثير عليه .. خليه يختار بنفسه.
أدم أنت معايا ولا معاه ............ أنا معاك يا شيطان .. لا ..........أنا معاك يا
ملاك ... لا أنا عايزك أنت تدينى كل اللى أنا عايزة .. عايز أعيش حياتى كلها بالطول
والعرض عايز أتمتع بالحياة لا .. لا ......... عايزك أنت ما تسبنيش ..
أنا عارفك وعارف مين اللى باعتك لى
الشيطان الدنيا كلها حا اخليها بين ايديك
الملاك الدنيا ده يا أدم حا يجيلها يوم وتزول
أدم قبل ما تزول الدنيا خلينى أذوق طعمها
الشيطان أحضن الدنيا وخذ منها اللى أنت عايزه
أدم أنا عارف أن الدنيا ده لها نهاية
الملاك فعلا .. لكن الفردوس مستنيك يا أدم .. فردوس أبدى لا يزول
أدم أنا معاك عايز أعيش .. لا ........... أنا معاك ما تسبنيش .. لا لا .... أنا
معاك أنت .. معاك,, معاك .. لا لا لا....... أنا معاك أنت .. ما تسبنيش .. ما
تسبنيش .. ما تسبنيش .. لالالالا.............أنا معاك ... أنت حا تسيبنى
الشيطان ولو حا تسيبنى يا أدم .. أنا مش حا أسيبك .. شفت قد أيه أنا متمسك بيك يا أدم .
الملاك أختار يا أدم .. اختار ملكوت السموات
الشيطان أوع تضيع فرصة واحدة من متاع الدنيا .
أدم خدنى ورينى دنيتك ,.. لا ...........أوع تسيبنى أنا محتاجلك.. خليك حارسى
الأمين .
الملاك طول حياتك حا تلاقينى جنبك ..
الشيطان تعالى يا أدم .. الدنيا فتحالك أيديها
الملاك حاسب يا أدم
الشيطان تعالى يا أدم ما تخافش تعالى
أدم حرام .. حرام .. ما تأثر وش على .. أنا عارف كويس الفرق بينكم .. عارف الخير
فين والشر فين .. سيبونى أختار بنفسى سيبونى أختار .. كفاية.. كفاية.. كفاية .
الشيطان قلت أيه يا ملاك .. نسيبه يختار .. ولا لسه عندك كلام ثانى
الملاك مادام الإنسان عارف يفرق بين الخير والشر يبقى خلاص .... هو حر .. نسيبه
يختار بس بشرط
الشيطان قول وأنا موافق
الملاك يختار بدون تدخل منك ولا منى
الشيطان وماله أنا موافق .. على الأقل لو أختارنى يبقى كسبته .. ولو ما أخترنيش أنا مش
خسران حاجةة
الملاك يبقى خلاص .. روح يا أدم واختار .. وحسب أختيارك حاتكون أخرتك
( يختفى الملاك والشيطان)
أدم خلاص سابونى .. بقيت لوحدى .. أقرر مصيرى بنفسى ... أحدد دنيتى .. أعيش حياتى
أمشى مع الشيطان بكل ما عنده من ملذات .. ولا أمشى مع الملاك فى دنيا كلها محبه
وصلاة ليه ليه .. حا أحاول أجرب .. حا أحاول أعيش .. حا أحاول أرضى الطرفين ..
واللى يحصل يحصل
( بلاك أوت/ يختفى أدم / ثم يضاء المسرح بضوء خافت..
ويظهر سمير منطلقا من شمال المسرح الى يسار المسرح وخلفة ثلاثة شباب )
الصوت ( من وراء الكواليس) حرامى .. حرامى .. أمسك حرامى
وجدى ( يدخل من الشمال) ويبحث عن سمير وينادى عليه) سعيد
سمير (يدخل) خلاص مشيو
وجدى خلاص مشيو .. هو أحنا بنلعب .. أنت جريت يمين .. وأنا قلتلهم جرى شمال راحوا
جريو شمال ( يضحكون)
سمير طيب كويس
وجدى بس أنت عليك جرى ولا الرهوان .. المهم تعال نشوف المحفظة فيها أيه
سمير تعالى نقعد نشوفها .. ياه ديه مليانه فلوس
وجدى الظاهر صاحبها مريش قوى ... ورينى كده
سمير خذ يا سيدى عد براحتك
وجدى عشرة عشرين ثلاثين أربعين خمسين ............... الخ
سمير أيه الأوراق ديه
وجدى ياسيدى مالنالش فيها أرميها
سمير بس نشوف الأول أيه هيه

وجدى ياعم ما تشغلش بالك
سمير روشته علاج .. جواب لمستشفى .. وديه مطالبه عملية
وجدى أرمى يا عم بلاش قرف
سمير يظهر صاحب المحفظة .. عنده واحد عيان بالمستشفى وعامل عملية
وجدى واحنا مالنا وماله
سمير دول طالبين حساب عملية
وجدى ما قلتلك ما تشغلش بالك
سمير هى الفلوس طلعت كام
وجدى 1800 جنية
سمير نفس مبلغ مطالبة العملية
وجدى يبقى كل فينا 900 جنية
سمير 1800 جنية يبقى دول فلوس العملية .. الراجل ده كان رايح يدفع فلوس العملية
وجدى وماله يشوف غيرهم
سمير زمان الراجل حا يتجنن .. يا عالم جايبهم منين
وجدى بقولك أيه .. الشغلة بتاعتنا ما تعرفش العواطف
سمير بس يا وجدى
وجدى بلا وجدى بلا زفت .. ياعم ياللا نعيش حياتنا ونشوف حانسهر فين .
سمير أنا مش مستريح من الموضوع ده
وجدى بقولك أيه بلاش غم .. ياللا بيننا زمان الشلة مستنيانا
سمير وبعدين بقى
وجدى ولا بعدين ولا قبلين .. ياللا يا حنين
سمير ياللا مافيش فايدة .. هو نصيبه كده
وجدى كده تعجبنى
سمير ياللا ماحدش بياكلها بالسهل
(بلاك أوت و يخرجون
ويظهر الملاك والشيطان مع إضاءة الأسبوتات اللازمة لهم )
الشيطان أيه رأيك
الملاك أدم لسه الطمع جواه
الشيطان ولسه حانشوف منك يا أدم ..
الملاك هو لسه فى حاجه ثانية
الشيطان ده بس كانت البداية
الملاك يعنى أيه .. مافيش فايدة فيك يا أدم
الشيطان هو ده أدم .. مجرد ما تديله فرصة فى أى حاجه .. على طول يخلص
الملاك أنا حاسس أنك حرضت وجدى على سمير علشان يوقعة فى الشر
الشيطان وأنا حاسس بيك وأنت بتأثر على سمير علشان يرجع الفلوس
الملاك وبعدين
الشيطان أبعد عن أدم .. وأوعدك أنى حا أبعد أنا كمان .. وسيب أدم يتصرف لوحده ..
مادام عارف الخير من الشر
أدم خايف أوعدك وأنا متأكد أنك مش حا تنفذ وعدك
الشيطان المرة ديه أوعدك أننى حا أراقب الموقف من بعيد .. وأنا متأكد أن أدم ما تملاش عينه
غير التراب
الملاك ما فيش فايدة فيك يا شيطان .. أنت سبب كل اللى حصل وبرضه حا تكون السبب فى
اللى حا يحصل .. بسببك حا تدمر الإنسان
الشيطان أنا تحت أمر الإنسان .. مادام الإنسان موجود على الأرض حا أكون أنا كمان موجود.
وياريت تسيبلى الإنسان وتطلع أنت لفوق فى السماء .. نازل وراء أدم ليه ,, سيبهولى
الملاك نازل علشان الإنسان... علشان أحميه منك ومن الآعيبك
الشيطان ما كان عندك فوق فى السماء ومارضاش ونزل .. هو أختار.. جاى وراه ليه ثانى
الملاك جاى علشان أكون معاه .. انور له حياته .. أرشده للصواب .. أبعده عن شرك
المحتوم
الشيطان أنا الشر ما أعرفهوش .. أنا بحقق للإنسان رغباته .. طموحاته .. أمنياته ..
نذواته .. وعمرى ما حا أكون بخيل عليك يا أنسان
الملاك كل حاجه حا تديها للإنسان.. حاتكون سبب هلاكه
الشيطان أنا عمرى ما حا أجبر الإنسان على شىء هو مش عايزه,, رافضه .. لكن لما يطلب
لازم أستجيب له فى الحال .. وفى ناس كثير ما بيطلبوش منى حاجه.. ماليش دعوه
بيهم هما أحرار .. ذنبهم على جنبهم .. لكن عينى عليهم .. بدور على نقطه
ضعفهم .. وساعتها حايتمنوا أنفذلهم رغباتهم
الملاك هو ده أسلوبك .. تدور على نقطة الضعف فى الإنسان وتستغلها حاجه مش جديده عليك
الشيطان تعالى نشوف سمير ووجدى حا يعملوا أيه .. ونسيب لهم حرية الاختيار .. بس مش حا
أسيبك يا أدم
( يختفى الملاك والشيطان ويفتح الستار الثانىعلى غرفة بها ترابيزة
وأربع مقاعد ويجلس كل من عماد ومجدى )
عماد سمير ووجدى أتاخروا قوى
مجدى وفيها أيه .. تلاقى المواصلات عطلتهم
عماد أنا خايف ليكونوا أتمسكوا المره ديه
مجدى وفيها أيه .. نجيبلهم عيش وحلاوة
عماد لا دول أتاخروا قوى .. أنا مش مطمئن
مجدى بقولك أيه جمد قلبك .. وبلاش لعب عيال
( الباب يقرع )
عماد مين ... مين
مجدى ما تفتح وتعرف مين
عماد حاضر .. حا أفتح .. ربنا يستر
مجدى ياه على جبنك .. افتح الباب
عماد وماله يا خويا .. حا أفتح الباب .. حا أفتح الباب
( يفتح الباب ويدخل وجدى وخلفه سمير)
وجدى ميت مسا ..
سمير مساء الخير
مجدى قول صباح الخير.. هى الساعة كام دلوقت
عماد مش مهم الساعة كام .. كويس أنهم رجعولنا بالسلامة
وجدى أيه يا أبنى هو أحنا كنا بنحارب
مجدى أيه سبع ولا ضبع يا أبو السعد أنت
وجدى طبعا سبع .. سبع أيه .. قول تمساح
مجدى حاسب علينا يا عم لأحسن يبلعنا
عماد أنا لازم أروح دلوقت
مجدى ليه يا حبيبى ماما وبابا وحشوك.. أيه يا سمير ما تقول حاجه
سمير حا أقول أيه ربنا يستر
وجدى أيه حا نقعد نتكلم .. أيه مش حانلعب ولا أيه
مجدى طبعا حانلعب .. بس ماعندناش حاجه لزوم السهرة
وجدى ما تطلع يا سمير خمسين جنيه لزوم القاعدة
سمير حاضر ( يخرج خمسون جنيه من الفلوس ) أدى خمسين جنيه
مجدى ياه .. كل ديه فلوس .. الظاهر عملية النهاردة سقع قوى
وجدى طبعا مش قلتلك تمساح يابا ( يأخذ الخمسين جنيه)
مجدى أيه يعنى كام كده
وجدى 1800 جنيه
مجدى أيه الحلاوة ديه كلها .. ومطلع خمسين جنية بس
سمير هى خمسين جنيه ما فيش غيرها
عماد حد شافكو وأنتم داخلين هنا
مجدى بس يا أبو قلب رهيف .. أنت طالع خايب وجبان ليه

عماد أنا لازم أروح دلوقت
وجدى ما أحنا كلنا مروحين .. خذ بس الخمسين جنيه ديه وروح هات أى حاجة لزوم السهرة
عماد دلوقت .. أنت عارف الساعة كام دلوقت
مجدى أيوه يا ظريف .. عم متولى لسه فاتح ..
عماد لا أنا ما أنزلش الساعة ديه
وجدى بقولك أيه حا تنزل ولا لا
عماد لا
مجدى هات الفلوس يا جبان.. أنا حا أنزل
( يأخذ الفلوس من وجدى وينزل )
وجدى ياللا نلعب دور لحد ما ييجى مجدى
سمير أنا ماليش نفس للعب
وجدى ليه كده أزعل .. مالك .. أنت النهاردة عريس القاعدة
عماد سمير أنت سرقت المحفظة أزاى
وجدى قال لها جلا جلا لاقاها فى أيديه
عماد أنا خايف قوى
سمير أمال أنا أعمل أيه
وجدى أيوه .... أنت تعزف وهو يقسم .. فى أيه مالكم النهارده
عماد أنا قلقان قوى
سمير وأنا مش مستريح من اللى بيحصل كل يوم
وجدى وماله نغير النظام
سمير يا وجدى أفهمنى .. أنا نفسيتى بقيت تحت الصفر
وجدى أنت محبكها ليه النهاردة .. ما العملية ماشية ألسته
سمير طبعا ماشية .. مدام فلوس بتيجى من غير ما نتعب فيها
عماد ما أحنا مش حا نبطل ألا لما نتمسك مرة ونروح فى ستين داهية
وجدى لا أنتم النهاردة مش طبعيين .. أيه الموضوع بالظبط
سمير الموضوع .. خلاص لحد كده .. أنتم من طريق وأنا من طريق
عماد وأنا معاك يا سمير
وجدى يعنى أيه
( يفتح الباب من الخارج ويدخل وجدى)
وجدى تعالى يا سى مجدى شوف صحابك .. مخهم ضرب
مجدى خير يا جماعة أيه الحكاية
سمير أنا ماشى ومش راجع هنا ثانى
وجدى صاحبك عايز يزوغ بالفلوس اللى معاه
مجدى وماله كل واحد يأخذ حقه
وجدى هات نصيبنا ومترح ما تروح روح
سمير الفلوس اللى معايا حا ترجع لصاحبها
مجدى نعم يا خويا سمعنى ثانى
سمير الفلوس حا ترجع لصاحبها
وجدى طب أزاى .. حا تروح تقول لهم أنا سرقت المحفظة وجاى أرجعها
عماد عين العقل ياخويا سمير
مجدى اه .. بقى الموضوع كده .. لا يا حبيبى .. تتصرف فى حقك اه .. أنما فى حقنا لا
عماد ما لازم الفلوس ترجع كلها
وجدى أنت تسكت خالص .. فاهم
سمير كلام عماد مظبوط .. لازم الفلوس كلها ترجع
مجدى وقصدك كلامك ده يخيل علينا
سمير على العموم مالكمش حاجه عندى
وجدى ده أخر كلام عندك
سمير وماعنديش غيره
مجدى أكيد أنت مش فى وعيك
سمير بالعكس أنا النهارده فى وعى كامل عن أى يوم .. كفاية شر كفاية شر .. حرام عليكم
جرتونى معاكم .. أنا مش كدةأنا مش كده .. أنا مش كده
وجدى ( يصفق ) برافو .. ممثل هايل .. صفقوا يا جماعة صفقوا كمان بس أنت وهو ..بتصفقوا على أيه .. هات الفلوس يا سمير
سمير لا لا لا
عماد أوعى تديهم حاجه يا سمير .. ياللا نمشى من هنا
مجدى يبقى ما فيش حد حا يخرج من هنا ألا ...
وجدى ( يقاطعه) أستنى يا مجدى .. أنا حا أتصرف معاه
سمير ما تتعبوش نفسكم الفلوس حاترجع لصاحبها يعنى حا ترجع
مجدى يبقى نهايتك على أيدى
عماد أنا عارف ديه أخرتها
وجدى أسكت أنت .. مش عاوزك تتكلم خالص
عماد وماله يا خويا .. أسكت خالص
وجدى ما تعقل يا سمير مش عاوزين مشاكل
سمير أنا كنت مجنون لما طاوعتكم ..لكن خلاص عقلت وعرفت أن كل اللى بنعمله غلط ..

غلط .. غلط .. ياللا يا عماد
مجدى ( يخرج مطواة من طيات ملابسه ) هات الفلوس وأخرج
سمير مافيش فلوس .. وابعد عن سكتى.
( يحاول مجدى أخذ الفلوس بالقوة من سمير ويقاومه سمير ويرفع مجدى
المطواه ويتصدى لها وجدى فتستقر فى صدره ويقع على الارض )
وجدى قتلتنى يا مجدى
مجدى أيه اللى أنا عملته ده .. لا لا لا
سمير أنت مجنون .. مجنون .. قتلت وجدى.. قتلت وجدى
مجدى أنتم السبب .. أنتم السبب ( يجرى خارجا )
( يتجه سمير وعماد حول وجدى وهو يلفظ أنفاسة الأخيرة)
سمير وجدى .. وجدى
وجدى هو ده نهايه الشر
( وتنحدر رأسه أمامه منتهيا )
عماد لا لا لا
سمير ياريتك كنت سمعت كلامى يا وجدى .. أدى أخرة الشر ياريتك كنت طاوعتنى .. لكن
لابرضة أنا السبب .. ديه غلطتى ولازم أسلم نفسى .... أنا الخاطىء أنا الخاطىء ..
أنا الخاطىء ... كان لازم ما أطاوعش الشيطان .. كان لازم أبعد عنهم .. كان لازم ما
أسرقش... أدى نهاية الغلط .. أدى نهاية اللى يمشى وراء الشيطان .. أدى نهاية
الشر .. لازم أرجع اليك ياربى ..
لازم أتوب .. لازم أتوب .. سامحنى يارب .. سامحنى يارب .. سامحنى يارب
الصوت السماء تفرح بخاطى واحد يتوب أكثر من تسعه وتسعون بارا لا يحتاجون للتوبه .
( تجميد مشهد وتستدل الستار الثانى..
ويظهر الملاك والشيطان .. ويخرج أدم من وسط الستار الثانى )
الشيطان أيه رأيك فى اللى حصل يا أدم
أدم أنت السبب .. أنت السبب .. أنت اللى حرضتنى على السرقة .. أنت اللى حرضت
الإنسان يقتل أخية الإنسان
الشيطان كان ممكن الإنسان ما يسرقش .. كان ممكن الإنسان ما يقتلش... هو الإنسان مش عنده
عقل برضع يفكر .
الملاك ما فيش فايدة فيك يا أدم .. قلتلك أبعد عن طريق الشيطان .. لأن نهايته دمار
وهلاك .يا أدم أسمعنى .. يا أدم أبعد عن الشيطان .. ابعد عن الشيطان .. ابعد عن
الشيطان .
أدم مش قادر .. بيغرينى .. بيرضينى ..
الشيطان كل حاجه يا أدم بتعملها وأنت مبسوط .. فرحان .. ولما تقع تجيب المسئولية على .
أدم أنت السبب .. أنت السبب .. أنت السبب
الملاك خلاص يا أدم اللى حصل حصل .. ولازم يا أدم تعرف أن طريق الشر نهايته لازم
تنتهى بالشر
الشيطان ( يضحك ) كده متعادلين .. أنا أخذت أثنين .. وأنت أخذت أثنين .. يالا
رضا جبرنا
أدم خلاص .. حسبتها كده يا شيطان الشر .. أخذت أثنين .. وأخرتها معاك يا أنسان ..
مادام عارف تفرق بين الخير والشر ليه يكون الشر بس قدامك .. ليه الحسد فيك ..
ليه الطمـــــع جواك ليه الكبرياء ماليك .. ليه السرقة .. ليه القتل ..ليه ليه ليه
الشيطان كل دول أنا صممتهم .. وزرعتهم جوه الإنسان .. وعمرى ما زرعتى حاتموت طالما ا
لإنسان موجود .
الملاك حا يجيلك يوم يا أدم .. تندم على فعلك للشر .. حا يجيلك يوم يا أدم تندم على مشيك
وراء الشيطان .. حا يجيلك يوم يا أدم تقف أمام ربك تقدم كشف حساب .. حا تقول
أيه لربك..معرفش ؟
أدم لا
الملاك مافهمش
أدم لا

الملاك ما أعرف ش أفرق بين الخير والشر
أدم لا لا لا
الملاك حرام عليك يا أدم .. الشيطان عرف يضحك عليك
أدم هو ما ضحكش على .. هو بيشدنى اليه .. بيشد أنتباهى عليه بيقدملى حاجات
مالهـــاش حدود
الملاك غمض عنيك وقوله لا لا لا
أدم مقدرش .. مقدرش أشوف كل حاجه حواليا وأغمض عينى عليها.. مقدرش أشوف حاجه
حلوه وما أبصش عليها .. مقدرش الآقى حاجه حلوه وما أكلهاش .. مقدرش ما
أستطعمهاش .. مقدرش مقدرش مقدرش .
الملاك تعبتنى معاك يا ادم .. تركت لك الحرية لكن أختيارك غلط
الشيطان وليه ما تقولش أختياره كان صح .. عاش حياته ,, اتمتع بيها أكل اللى فى
نفسه .لبس أحسن لبس .. وجد نفسه فوقفوق أعلى المناصب الارضيه .
الصوت ماذا ينتفع الإنسان لو ربح العالم كله وخسر نفسه
أدم ألحقونى
الشيطان أنا أهه معاك ,, ومش حا أسيبك يا أدم
الملاك تعالى يا أدم فى حضن ربك
أدم أنا تعبت خلاص .. تعبت .. عايز أرتاح .. عايز أنام .. عايز أصحى .. عايز ..
مش عارف عايز أيه ..مش عارف عايز أيه
الشيطان أنا عارف اللى أنت عايزه
أدم لا لا لا أنت لا
الشيطان طلبك عندى .. تعالى
أدم لا لا لا
الشيطان مش حا أسيبك يا ادم .. مش حا أسيبك يا ادم .. مش حا أسيبك يا أدم .
أدم لا لا لا لا لا
( يختفى الملاك والشيطان ويدور أدم حوالين نفسه كالدوامة ويختفى فى وسط الستار الثانى ..
ويفتح الستار الثانى على غرفة فى منزل متواضع .. تجلس الأم مع أبنتها سلوى )
وائل ( داخلا ) صباح الخير ........ أيه فى أيه .. مالكم .. مش بتردوا الصباح ليه .
الأم شوف أنت عملت أيه
وائل عملت أيه
الأم ممكن تقولى جيت أمبارح الساعة كام
وائل جيت زى ما جيت .. ما حدش له حاجه عندى .. أنا حر
سلوى بزمتك مش حرام عليك .. كل يو م سهر لوش الفجر
وائل وبعدين بقى
الأم يا أبنى .. أنت ليه مش حاسس بينا .. اختك جالها عريس حا نعمل أيه
وائل حا نعمل أيه فى أيه ... مبروك
الام مبروك .. هى ده اللى قدرت عليها
سلوى خلاص ياماما ,, مافيش فايدة .. أخويا خلاص مابقاش مننا
وائل أنا مش عارف أنتم عايزين منى أيه
الام عايزين فلوس .. عايزين نجهز أختك
وائل منين يا حسره .. بح ما فيش .. ما عنديش
سلوى خلاص يا وائل .. أحنا مش عايزين منك فلوس أحنا عايزين وائل أخويا بتاع زمان ..
أيام ماكان حنين على .. أيام ما كان بيغطينى وأنا نايمة .. أيام ما كان بيأخذنى معاه
الكنيسة لكن يا خسارة بقيت واحد تانى غير أخويا اللى أتربيت معاه .. واحد ما
بشوفش وشه غير فى وش الفجر .. راجع بيطوح من كتر الشرب .. واللى بالشكل ده طبعا
حايكون جيبه خالى .. مافهوش ولا مليم ..ياخسارة ياخسارة ياخسارة .
الام على رأيك...منين ..( لوائل ) كفاية عليك السهر .. وتصرف فلوسك على صحابك ..
وكل يوم تيجى وش الصبح .. تتطوح من الهباب اللى أنت بتشربة .. ويتحرق البيت على
اللى فيه
وائل وبعدين بقى....أبتدينا
الام أحنا لا أبتدينا ولا انتهينا
سلوى خلاص يا ماما.. ما تتعبيش نفسك .. أنا مش عاوزه أتجوز ... مش عاوزة أتجوز
وائل أحسن برضه
الام ده كلام يا أبنى .. حد يجيله عدل أخته .. ويقول كده
وائل وأنا يعنى حا أعمل أيه
الام تدبر نفسك .. بلاش سهر .. بلاش الهباب اللى أنت بتشربه .. بلاش علشان خاطر أختك .. علشان خاطر صحتك
وائل ما لكيش دعوة بصحتى
سلوى ياماما .. ما تتعبيش نفسك معاه ..أخويا خلاص مات من زمان .. مافيش فايدة
وائل اهه قالتلك مافيش فايدة
الام قلبى غضبان عليك ليوم القيامة .. روح منك لله منك لله
سلوى ما تعمليش فى نفسك كده يا ماما . ..أنت عيانه ومش ناقصه
الام خلاص يا بنتى لينا رب يتولانا ..
وائل بلاش قرف .. أنا ماشى ( يخرج )
الام روح اله ما ....
سلوى ( تقاطعها) لا ياماما بلاش .. بلاش تدعى عليه .. ده برضه أخويا .. ادعيله ربنا يهديه
الأم طول عمرك حنينه يا سلوى .. ربنا يديلك على قد نيتك
سلوى ( تصلى ) يارب .. أنت عالم بحالنا .. وحال أمى المريضه .. ما تتخلاش عننا يارب
أنت عارف أنى ماليش حد غير أمى وأخويا ,, لكن أنت يارب تقدر ترجعه فى حضنك

ثانى
الام يارب .. مالناش حد غيرك .. نلتجىء اليه .. يارب يارب يارب
( يغلق الستار الثانى ويظهر وائل سائرا متأرجحا )
وائل ( يشدو مع نفسه ) مسا التماسى . مسا التماسى .. ياورد قاعد على الكراسى
( يدخل ثلاث شبان )
الاول مساء الخير يا أخ
وائل مين .. بتكلمنى أنا
الاول أيوه أيه اللى معاك ده
وائل ديه قزازة .. أنما ايه
الثانى هاتها
وائل وماله خذلك بق
الثالث أحنا حا نأخذها كلها ماشى
وائل لا راكب
الاول أنت حا تهزر معانا .. هات القزازة
( يأخذها منه بالقوة )
وائل ليه كده الله الله الله
الثانى طلع اللى معاك
وائل ما أنتم خذتوا القزازة
الثالث أنت حا تستعبط .. هات المحفظة
وائل لا لا
الأول فتشوه خذوا كل حاجه معاه
( يفتشونه ويحصلون على كل شىء معاه من فلوس ويستولون
على الساعة والخاتم والسلسة والجاكت الجلد)
الثانى كله تمام
الاول ما فيش حاجه ثانية معاه
الثالث لا ما فيش
الاول ارموه على جنب ..
( يزجونه على قارعة الطريق وينصرفون .. ويحاول النهوض ويقوم وهو يتأرجح
ويتجه يسار المسرح فتأتى سيارة وتصطدم به وتطرحه أرضا .. ويدخل ثلاث
أشخاص عند سماعهم صوت الاصطدام )
الاول لا حول الله يارب
السائق ده كان ماشى بيطوح قدامى
الثانى فعلا بقه كله خمرة
الثالث يا جماعة الراجل بينزف .. حد يطلب الإسعاف
السائق أنا مش غلطان يا جماعة
الثانى ما حدش قالك غلطان .. يا جماعة حد يطلب الإسعاف
الثالث خلاص يا جماعة اتصلت بالاسعاف وجايه حالا
الاول حد يدور فى جيوبه يمكن نعرف حاجه عنه
الثانى مافيش غير محفظه فاضيه خالص .. بطاقته أهه
الثالث أسمه أيه
الثانى وائل حنا .. وعنوانه أهه
وائل أه أه
الاول أستحمل شويه زمان الاسعاف جايه
الثانى أنت حاسس بأيه
وائل حاسس حاسس ( يروح فى غيبوبه )
الثالث الراجل راح فى غيبوبة
الاول ده بينزف .. حد يجيب منديل بسرعة يا جماعة
الثانى منديل اهه ..
( يلفون الجرح بالمنديل )
الثالث هى الإسعاف غابت كده ليه
السائق طيب ممكن أوديه أنا المستشفى بالسيارة
الاول ما ينفعش لانه بينزف ياما .. لازم أسعاف
( سماع صوت سارينه الاسعاف )
الثالث اهه الإسعاف وصلت
الاول الحمد لله
( تدخل الاسعاف وينزل رجال الاسعاف وينقلون المصاب ويخرجون ..
ويفضى المسرح تماما وتفتح الستار الثانى على غرفة بالمستشفى ووائل على
أحدى سراير المستشفى والعلاج مستمر )
وائل أنا فين .. أنا فين
الدكتور حمدالله على سلامتك
وائل أيه اللى جابنى هنا .. أيه اللى حصل
الممرضة حاجه بسيطة خالص ..
وائل ( يحاول القيام ) حصل أيه
الممرضة لا ما تقومش دلوقت .. خليك مستريح
الدكتور أنت أنكتب لك عمر جديد
وائل أيه اللى حصل
الدكتور عربيه ضربتك .. ونزفت كثير والحمد لله .. لحقناك
وائل أنا بقالى كام يوم هنا
الدكتور بقالك عندنا ياسيدى ثلاث ايام
وائل ثلاث أيام .. أمى و أختى .. ما عرفوش حاجه
الدكتور أختك هى السبب فى أنقاذ حياتك
وائل أختى .. أزاى
الممرضة لما أحتجنا دم .. اتبرعت بدمها علشان تنقذك.. ولولا أختك
وائل ارجوكى ما تكمليش
( تدخل سلوى )
سلوى أخويا
وائل أختى .. مش عارف أردلك جميلك أزاى
سلوى أنت أخويا وماليش حد غيرك .. وعمرى كله فداك.. دأنا أفديك بعمرى كله مش بشوية
دم
وائل مش عارف أقولك أيه
سلوى ما تقولش حاجه .. كفاية أنك رجعت لينا بالسلامة
وائل أمال ماما فين .. عايز أشوفها وأستسمحها
سلوى عمر الام ما تزعل أبدا من ولادها .. ديه أمك ماسبتكش لحظة
وائل هى فين عايز أشوفها .. أكيد زعلانه منى
( تظهر الأم من على الباب .. ثم تدخل )
الام عمرى ما أزعل منك يا أبنى
وائل أمى .. سامحينى
الام عامل أيه يا ضنايا
وائل أنا بخير يا أمى .. ربنا وقف معايا .. ربنا حب يدينى درس...سامحينى يا أمى
الام أنا مسامحاك ., وكفاية أنك رجعت لينا بالسلامة
وائل يارب أقبل توبتى .. الشيطان هو السبب .. هو اللى غوانى .. لكن من النهاردة .. أنا
معاك ياربى ..وحا أكون إنسان جديد وأنت يا سلوى قولى لعريسك ييحى يقابلنى علشان
نجهز الفرح وسامحينى أخطأت فى حقك كثير
سلوى أنت أخويا .. وعمر الضوفر ما يطلع من اللحم
وائل يخليك لى يا أختى .. وأنت يا ماما سامحينى
الام مسامحاك يا ابنى .. مسامحاك من زمان .. مسامحاك من بوم ما سبت البيت .. مسامحاك
من يوم ما تخليت عننا ..مسامحاك با أبنى رغم اللى عملته فينا .. بس ياريت تكون
أتعلمت من اللى حصلك .. وتعود لبيتك ,, وبتجمع شملن من جدبد .. ده أحنا يا ابنى
مالناش حد غيرك نتسند عليه ..أنت سندنا الوحيد .. أنا وأختك محتاجلك يا
أبنى ,, وكفاية علينا رجوعك لينا بالسلامة .. رينا يسامحك ياأبنى .. ربنا يسامحك يا

أبنى ...رينا يسامحك يا أبنى ...
( يغلق الستار الثانى ويظهر الملاك والشيطان )
الملاك لا هو أنت يا أدم ما تحسش بغلطتك ألا لما تقع تحت تجربه .. ماتعرفش الخير من
الشر ألا لما تقع فى الشر
الشيطان هو أدم كدة .. يموت فى طلباتى .. لكن لولا التجربة اللى حصلت .. كان حايبقى من
نصيبى لولا تبرع أخته بالدم.. الجايات أكثر من الرايحات .. وبرضه مش حا أسيبك
يا أدم
الملاك كفاياك شر .. وأبعد عن أدم وسيبه فى حاله
الشيطان أنا ما بروحش لحد .. هما اللى بيجونى .. هما اللى عارفين أنا مين وبيزورونى.. هما
اللى بيروحوا للتهلكه برجليهم ... هما اللى بيروحوا الأماكن بتاعتى .. واللى يجينى
لازم أرحب بيه وأقدمله كل طلباته وعليها شويه من عندى
الملاك يبقى لازم كل أماكن الشر تغلق
الشيطان العالم مش حا يبقى عالم من غير شر موجود فيه .. العالم مش حايبقى عالم من غير
حقد وانانيه .. طول ما أنا موجود لازم يكون هناك عالم .. ولو العالم أنتهى أحنا
حانروح فين .. حانسوق بضاعتنا فين .. أيه حا نقفل .. حانبقى عاطلين
الملاك يبقى لازم العالم يفنى وينتهى
الشيطان لما يفنى وينتهى يحلها حلال .. نبقى ندور على كوكب ثانى هو أحنا حا نغلب
الملاك يعنى أيه
الشيطان أهه .. أدينا بنتسلى مع الإنسان .. وبنضيع وقتنا .... زى ما بنضيع الإنسان
الملاك مهما تعمل .. فى النهاية الشر ينكسر أمام الخير .... فى النهاية الخير هو اللى بينتصر
الشيطان مش فى كل الحالات .. أحنا عندنا زبائن ضعيفة النفوس ضعيفة الإرادة . ضعيفة الشخصية .. ودول كثير وكفاية علينا
الملاك طول عمرك تبحث عن الإنسان الضعيف .. الفقير .. الغلبان اللى لا حول ولا قوة له .
الشيطان بالعكس .. الإنسان مهما تديله .. ومهما تشبعه .. عاوز ثانى وثانى وثانى .. ومش ح
أستخسر فيك يا أدم .. وحا أوريلك دلوقتى وأؤكدلك كلامى .
( يختفى الملاك والشيطان ويفتح الستار الثانى على غرفة بها مكتب وعدد أثنين كرسى )
( يدخل هانى الساعى )
هانى يا فتاح يا عليم يا رزاق يا كريم .. هيه ما فيش فايدة .. اللى نبات فيه نصبح
فيه .... كل يوم كنس ومسح .. وياريت نعجب .. ولا صفوت أفندى اللى طلباته ما
بتخلصش .. روح يا هانى .. تعالى يا هانى .. وما عندبش غير كلمة حاضر .. هوه راجل
طيب صحيح لكن كرشة واسع حبتين ... يموت فى الفلوس .. يبيع أخوه .. يبيع
الدنيا علشان الفلوس .ومصيرة يروح فى ستين داهية . لكن صفوت أفندى بيحبنى قوى
قوى .وبيعزمى جدا . وساعات يدلعنى ويقولى .. ياحمار .. مش بقولكم بيحبنى
صفوت صباح الخير يا زفت
هانى صباح الخير يا صفوت بك
صفوت أقفل الباب وراك يا مغفل
هانى حاضر ( يغلق الباب )
صفوت أيه عملت أيه
هانى كله تمام .. حسب تعليماتك الجهنميه
صفوت ومضى
هانى ومضى .. ما أنت عارف جبران بك بيحب يمضى على أى شىء .. وأنا حطيت
الشيك فى نص الورق ومضى وماخدش باله
صفوت برافو .. دلوقت تروح تصرف الشيك من البنك .. فريره
هانى حاضر يا صفوت بيه ( يخرج )
ياللا .. هو ده الكلام .. ولسه .. لازم أكون ثروة كبيرة ....وأعيش حياتى ,, لازم أتمتع
بالدنيا
( يدخل جبران باشا )
جبران صباح الخير با صفوت أفندى
صفوت صباح الخير يا جبران بيه
جبران أيه أخبار الشغل
صفوت كله تمام .. الشغل ماشى عشرة على عشرة
جبران أنا بعتمد عليك فى كل حاجه يا صفوت افندى .. أنا مش عارف من غيرك الشركة
كان حا تمشى أزاى
صفوت البركة فى سعادتك وتعليمات سعادتك .. أنت تأمر وأنا أنفذ
جبران ومبسوط فى الشغل معانا ولا لا
صفوت هو حد يشتغل مع سعادتك ومايكنش مبسوط
جبران وعامل أيه فى المواصلات .. أنا عارف أن بيتك بعيد عن هنا
صفوت أهه مرة أركب أتوبيس ومرة مشروع وماشية والحمد لله
جبران لا يا صفوت .. أنت النهارده تروح فرع الشركة بطوسون وتختار عربيه ,, وديه أقل
حاجه نقدمها للموظفين الشرفاء أمثالك .. نظرا لكفائتك وأخلاصك فى العمل .
صفوت عربيه لى أنا
جبران أيه كثير عليك عربيه .. أنت تستاهل كل خير يا صفوت أفندى
صفوت آه .. قصدى ربنا يخليك لينا يا جبران بيه
جبران وأيه أخبار عروستك ..
صفوت أهه بندور على شقة .. لكن سيادتك عارف الشقة اليومين دول بالشىء الفلانى .
جبران بسيطة .. روح الحسابات .. وأنا حا أبلغهم يصرفولك عشرين ألف جنيه .. ممكن
يساعدوك على ايجاد شقة مناسبة.. . وتبقى تسدهم على راحتك
صفوت كام عشرين ألف جنيه .. كثير يا جبران باشا
جبران بلاش غلبه ياصفوت أفندى .. حا أروح بقى أمر على بقية الفروع
صفوت أتفضل سيادتك
( يخرج جبران بيه)
الراجل ده عنده فلوس مش عارف يوديها فين .. أنا عارف حا يعمل بيها أيه ديه
كله.. ده لو أكلها أكل مش حا تخلص..ياللا .. مال الكنزى للنزهى . اللى هو أنا ..
هانى ( يدخل ) الاكسبريس وصل
صفوت قلتلك ستين مرة لما تدخل تقفل الباب وراك
هانى حاضر ( يقفل الباب )
صفوت أيه صرفت الشيك
هانى طبعا .. هو أحنا بنلعب

صفوت هات الفلوس
هانى ( يعطيه الفلوس ) حقى
صفوت بعدين .. ايه حا نتحاسب هنا .. ما شفوناش وأحنا بنسرق يشوفونا وأحنا بنتحاسب ..
هانى ماشى يا عسل .. أنا عارف حقى محفوظ .. فى الأمان يعنى... وأنا رقبتى سداده
صفوت طيب روح أعملى قهوة مظبوط
هانى طبعا .. قهوة مظبوط علشان تمخمخ لينا عمليه جديدة
صفوت بطل غلبه وروح أعمل القهوة
هانى ( خارجا) من عينيا .. قهوة محوجه من عمايل ايديا
صفوت ( يعد الفلوس ) خمسة آلاف جنيه .. حلو قوى .. والأسبوع اللى فات ثلاث .. واللى
قبلة أثنين . واللى قبلة واحد ونص واللى قبلة ألف يبقى المجموع كله 12 ألف
ونص ,, ولسه حاتحلو .. لازم أكون مليونير ,, لازم أكون جبران باشا ...
هو أجدع منى فى أيه .. ما كلنا ولاد حواء
هدى ( تدخل ) صباح الخير
صفوت مين هدى .. أيه بس اللى جابك هنا
هدى أيه مش عاوزنى أجى هنا ليه .. مش عايز تشوفنى
صفوت مقصدش .. بس
هدى بس أيه .. أنت مش وعدتنى تجيب لى الخاتم الالماظ .. ولا نسيت يا روحى
صفوت أصبرى على وأنا أجيبلك اللى أنت عايزاه
هدى وأخبار الشيك بتاع النهارده أيه
صفوت طبعا صرفناه
هدى مش أنا اللى مقلده خط جبران بيه فى كتابة الشيك .. يعنى من غير خطى يبقى الشيك
ملهوش فايدة
صفوت وأنا قلت حاجه.. هو أنا بعمل كل ده علشان مين .. مش علشانك
هدى ماشى .. و الخاتم
صفوت حايكون النهارده عندك
هدى أهه كده الكلام .. بقولك أيه يا صفوت
صفوت قولى .. وأنا على أنفذ
هدى حكاية كل شهر نضرب شيك .. حكاية مش جايبه همها
صفوت قصدك أيه
هدى قصدى عملية كبيرة... تحقق كل أحلامنا
صفوت أنا من أيدك ديه لأيدك ديه
هدى تعجبنى
صفوت أعرف بقى أيه اللى جوه دماغك
هدى أنا بقى اللى فى دماغى .. حاجه كبيرة قوى .. ضربة العمر
صفوت قصدك أيه
هدى قصدى مرتبات الشركة كلها
صفوت أزاى
هدى أكيد أنت تعرف أمته مرتبات العاملين بيجيبوها من البنك
صفوت طبعا ممكن أعرف .. سهلة قوى ..
هدى أيوه .. عليك تقوللى الميعاد أمته والخطه عندى جاهزة على التنفيذ
صفوت خطة .. أزاى .. فهمينى
هدى المهم الخطه لازم يكون فيها هانى
صفوت هانى الساعى
هدى أيوة مش هو شريك معانا
صفوت أيوه
هدى وبتثق فيه
صفوت طبعا .. ده هو اللى بيصرف كل الشيكات اللى أحنا بنضربها
هدى حلو قوى ( تقدم له مظروف ) وأدى الخطه مكتوبه مئه المئه
صفوت ( يفتح المظروف ويتطلع على الخطة ) ياه أيه الأفكار الجهنميه ديه
هدى دأنا هدى والأجر على الله
صفوت طبعا .. هو فى أحسن من كده
هدى وطبعا العملية ديه أنا لى فيها خمسين فى المئه
صفوت نعم .. ليه .. أنت ناسيه أن فى شريك ثالث
هدى أنا النصف وانتم الأثنين النصف .. قلت أيه
صفوت حا أقول أيه ماشى ..
هدى أيه مش ناوى تجيبلى حاجه صاقعة
صفوت ياسلام بس كده ( يرن الجرس )
( يدخل هانى )
هانى طلباتك يا صفوت أفندى .. أهلا هدى هانم
هدى أزيك يا هانى
هانى كله ألسته ... ربنا يخليكلى لينا
صفوت بلاش غلبه .. هات حاجه صاقعة لهدى هانم
هانى أحسن حاجه صاقعة لهدى هانم
( يخرج هانى )
هدى هو يعرف أننى اللى بقلد خط جبران باشا
صفوت لا .. أنتى أتجنيتى .. طبعا ما يعرفش
هدى أحسن برضه ... بس ياريت يوافق على تنفيذ الخطه
صفوت حايوافق ده يموت فى الفلوس
( يدخل هانى ومعه مشروب )
هانى أحسن حاجه صاقعة عندنا
هدى متشكرة يا هانى .. أبقى خللى بالك من البيه
هانى البيه فى عنيا من جوه .. دأنا لحم كتافى من خيره .. حاجه ثانى يا صفوت أفندى
صفوت لا .. ولما أعوزك حا أبعتلك
هانى حاتلاقينى فريره عندك .. عن أذنكم
( يخرج هانى )
صفوت أشربى الحاجة الصاقعه و تروحى دلوقتى قبل ما حد يشوفك هنا
هدى هو أنا مش خطيبتك
صفوت أيوه بس
هدى لا بس ولا حاجه .. المهم العملية الكبيرة بتاعة المرتبات
صفوت كلها كام يوم ونهبر الهبرة الكبيرة .. ربع مليون جنيه
هدى آهه ده الكلام المفيد .. باى .. حا أستناك النهاردة .. وطبعا معاك ال ...
صفوت معايا الخاتم با ( تخرج هدى ) يا ساتر .. مش بتشبع فلوس
هانى ( يدخل ) أجدع قهوة لصفوت بيه
صفوت عاو زك ياهانى تعرف أمته مدحت أفندى حايروح البنك يجيب المرتبات
هانى ياه .. بقى حضرتك .. مستنى تعرف القبض أمته .. ليه مفلس
صفوت يبقى أنت مش فاهم حاجه
هانى فهمنى نورنى رسينى
صفوت العملية الكبيرة
هانى قصدك .. اللى اللى .. يا نهار أسود
صفوت ولد
هانى دانت لسه ما شربتش القهوة .. أمال لو شربت القهوة حاتعمل أيه .. حا تسرق البنك
المركزى .
صفوت مادام هنا فى مخ يبقى
هانى يبقى كله ألسته
صفوت ياللا روح شمشم على الموضوع
هانى فريره
( يخرج هانى )
صفوت صحيح لم تمت العمليه ديه .. يبقى الواحد مليونير بصحيح الواحد يبقى زى الناس اللى
عندها فلوس بالكوم ..
( يرن جرس التليفون )
صفوت ألو .. مين معايا .. أيوه يا جبران بيه .. أمر .. لا كل شىء تمام .. لالا أنا قاعد
شويه .. أصلى عندى شغل ..وسيادتك عارف طول ما عندى شغل ما أقدرش أروح
واسيبه ابدا .. شكر يا جبران بيه .. ما تقلش كده .. ديه الشركة كلها فى عنيه .
ماشى يا جبران بك .. مع ألف ألف ألف سلامة .

هانى ( يدخل ) كله تمام التمام
صفوت أيه السرعة ديه
هانى طبعا .. أول ما طلعت من عندك ندانى مدحت أفندى وقاللى بكرة الساعة 8 الصبح
تكون جاهز علشان تروح معايا البنك ... وسألته مين معانا .. قاللى مافيش حد ..
يعنى أنا وهو بس
صفوت أحلوت
هانى أزاى .. مش ترسينى
صفوت أنا عندى خطة جهنمية .. كل شىء مدروس ومعمول حسابه
هانى قول يا أجدع مخطط عالمى
صفوت شوف فى حد بره ولا لا .. وأقفل الباب
هانى حاضر ( يذهب ويرجع ويقفل الباب ) كله ألسته ولا الهواء
صفوت بكرة الصبح حاتروح مع مدحت أفندى البنك .. وأنتم راجعين حاأديلك حاجه تحطها
فى مشروب وتخلى مدحت أفندى يشربها وبعدين تقول للسواق عايز علبه سجاير ..
حايقف وينزل يجيب علبه السجاير .. حا تلاقينى جنبك ومعايا شنطةأخت شنطه
مدحت أفندىتأخذها وتناولن الشنطة الثانية .. ولما يرجع السواق كأن مافيش حاجه
حصلت.. وثوانى ومدحت أفندى حايفوق ولا مين شاف ولا مين درى .
هانى ما مدحت أفندى حا يحس بأن الشنطة فاضية
صفوت يا غبى..... أنا حا أديلك شنطة مليانه
هانى فلوس مزيفة
صفوت لا يا حدق مليانة طوب
هانى ولما يروحوا الشركة ويكتشفوا أن الفلوس مش موجودة
صفوت وأنت مالك .. أنت لا جبت حاجه ولا شفت حاجة ,, ولا أستلمت حاجه .. أنت
مجرد ساعى
هانى ولما حا يسألنى
صفوت لما مدحت أفندى يوصل الشركة حايدخل الخزينه وأنت حاتروح شغلك أيش عرفك بقى هو عمل أيه الشنطة
هانى يقوم هو يلبس الموضوع كله
صفوت عفارم عليك
هانى ايه ده أنت معجون بميه شياطين
صفوت ديه الشياطين تجيلى وأنا أعلمها
( تنزل الستار الثانى ,, ويظهر الملاك والشيطان)
الملاك أنت فين يا أدم
الشيطان أظهر وبان يا أدم .. ياللى غلبت الشيطان يا أدم
الملاك مافيش فايدة فيك يا أدم
الشيطان شفت أدم .. بيقول أحنا نتعلم منه
الملاك على العموم .. لسه مش عارفين حا يحصل أيه
الشيطان النهاية معروفه .. با أما يأخذ الفلوس علشان أدم طماع ... وأن عرفوه ومسكوه حا
يحكموا عليه .. وفى الحالتين أنا كسبان
الملاك كده يا أدم .. ليه تبص لغيرك .. ليه الحسد والطمع .. ليه مش راضى باللى قسمهولك
ربنا .بتأخذ مرتب كويس ..وصاحب الشغل مش مخليك محتاج حاجه .. عاوز أيه
ثانى ..عربيه وجبهالك .. فلوس وعطهالك .. تقدر تقوللى عايز أيه ثانى .
( يخرج أدم من بين الستار الثانى )
أدم عاوز أكون مليونير .. أحب أكون معايا فلوس .. الفلوس بتعمل النفوذ
الشيطان ولسه كل ما تملك فلوس أكثر .. حاتعمل حاجات أكثر .. وكفاية أنك اللى فى نفسك حا تعمله .. حا تعيش حياتك .. لبس و أكل وشرب وسهر وفرفشة .. ومافيش حد حا يكون
أحسن منك .
الملاك الفلوس حا تنسيك مبادئك .. الفلوس حاتكون عليك نقمه ... الفلوس حا تغيرك .. حا تبدلك ..وحا تنسفك .. وتضيع حياتك
أدم بالعكس الفلوس حا تخلينى فوق الجميع
الملاك وأخرتها
أدم لما تيجى أخرتها
الملاك حا تندم يا أدم .. حا تندم يا أدم .. حا تندم يا أدم
أدم وأندم ليه .. هو أنا عملت أيه
الملاك أخذت حاجه مش باعتك .. مش من حقك
أدم اللى أخذت منه عنده كثير .. وأنا ما عنديش .. اللى أخذت منه بيلبس أحسن لبس ..
وأنا مافيش .. اللى أخذت منه عايش حياته وأنا عايز أعيش .
الشيطان لازم يا أدم تعيش .. ده حلاوة الدنيا ما تتنسيش
أدم على رأيك لازم أعيش ... ولازم أخذ من الدنيا كل حاجه.. لسه على وقتى كثير
الملاك لا يا أدم .. عمر الدنيا ما حاتديلك .. وعمر الوقت ما يتحسب ممكن وقتك فى
لحظةينتهى
أدم يعنى أيه .. يعنى أنتهى قبل ما أعيش حياتى بالفلوس اللى جمعتها
الملاك ممكن قوى ..فكر حا تعمل أيه .. قبل الندم .. والفرصة لسه قدامك
الشيطان يا أدم عيش النهارده .. ما تفكرش فى بكره
أدم وبعدين معاك يا أنسان .. ماتفكر شويه وما تكونش جبان . حاتعمل أيه فى أخيك
الإنسان .
( يختفى الملاك والشيطان و أدم ..
ويفتح الستار الثانى على مكتب صفوت بيه )
هانى ( يدخل مسرعا) أنت قاعد هنا والدنيا مقلوبه
صفوت بس قوللى حصل أيه .. ما تخافش
هانى جبران أفندى لما فتح الشنطه ولاقى فيها طوب .. وقع على الأرض وجاله شلل ,,
والبوليس والنيابه والدنيا كلها فى الخزينه ..
صفوت خليك بعيد وراقب الموضوع من بعيد
هانى وأنت حا تفضل قاعد كده
صفوت كأننى معرفش حاجه
هانى ولو أستدعونى
صفوت قولهم كل حاجه بالضبط .. ما عدا حكاية الشرب وتغيير الشنط
هانى أنا ياللا ساعى .. هات كذا .. خذ كذا .. روح هنا .. تعالى هنا وبس
صفوت برافو عليك .. روح دلوقت علشان ماحدش يأخذ باله
هانى أروح البوفيه .. أعمل شاى للبهوات بتوع التحقبق ,, عن أذنك
( يخرج هانى )
صفوت ياللا... وادى ربع مليون جنيه .. ولسه حا تحلو
جبران ( داخلا ) صفوت أفندى .. أنت هنا ومش حاسس بالنصيبه اللى بره
صفوت نصيبه أيه يا جبران بيه
جبران المرتبات أتسرقت
صفوت أتسرقت .. ازاى .. لالا مش ممكن
جبران هو ده اللى حصل
صفوت وأزاى ده حصل
جبران دبرنى أعمل أيه ... أنا كده أتخرب بيتى ... ولا مدحت أفندى الراجل الطيب الغلبان

جاله شلل
صفوت شل ... من أيه
جبران لما عرف أن الفلوس أتسرقت منه.. ما أستحملش الصدمه
صفوت يعنى أيه .. مش هو اللى راح جاب الفلوس .. أزاى أتسرقت منه
جبران الشنطه لقوا فيها طوب بدل الفلوس
صفوت أيه الكلام الفارغ ده .. معقوله
جبران هو ده اللى حصل
صفوت ومدحت أفندى ما قالش أيه اللى حصل
جبران ده جاله شلل مش بيتكلم خالص
صفوت ما يكنش مدحت أفندى عمل نفسه مشلول علشان هو اللى
جبران ما تكملش .. مدحت أنا عارفه كويس .. زى ما أنا عارفك كويس
صفوت أمال الفلوس بس راحت فين
جبران مش عارف ..أنا حا أتجنن
صفوت أتصلتوا بالنيابه ولا البوليس
جبران ايوه .. ووصلوا .. وحققوا شوية .. وخذوا الشنطه ومدحت أفندى للتحقيق
صفوت أنا متأكد أن مدحت أفندى له يد فى السرقة
جبران وليه متأكد من كدة ..لاحظت عليه حاجه
صفوت لا .. أحساسى بيقوللى كده
جبران اللى قولى أستلمت العربية بتاعتك
صفوت أيوه .. متشكر .. مش وقته الكلام ده خلينا فى النصيبه اللى عندنا
جبران ولا يهمك .. الفلوس كثيرة والحمد لله
صفوت ربنا يزيدك كمان وكمان
جبران وصرفت الشيك اللى عملتهولك أبو عشرين ألف
صفوت أيوه . لكن
جبران لكن أيه عايز فلوس ثانى
صفوت لا .. لكن يا جبران بك .. احنا فى ايه ولا ايه دلوقت
جبران قوللى يا صفوت أفندى .. طلبت منى حاجه وبخلت عليك
صفوت أنا لحم كتافى من خيرك يا بك
جبران ( يتجه ناحية الباب وينادى ) أتفضل يابيه
( يدخل وكيل النيابه )
صفوت أهلا .. مين حضرته
جبران حضرته وكيل النيابه
صفوت أهلا أهلا .. اللى جاى يحقق مع مدحت أفندى مش كده
جبران لا .. جاى علشان يكشف كل اللى عملته حضرتك فى الشركة
صفوت بتقول أيه
الوكيل أقعد يا صفوت أفندى
صفوت أنا مش فاهم حاجه
جبران دلوقت حا تفهم كل حاجه
( يتجه جبران الى الباب وينادى )
جبران هانى
هانى ( يدخل ) أية ياسعادة الباشا
الوكيل قول يا هانى كل الكلام اللى قلتهولى بره
صفوت أنا ما عملتش حاجه
الوكيل هو حد اتهمك بحاجه
صفوت أمال أيه الحكاية
جبران عايزين نعرف منك أنت الحكاية
صفوت هاتوا مدحت أفندى وأسألوه
جبران لكن ده مشلول
صفوت أستنوه وسألوه
مدحت ( يدخل ) أنا موجود يا سعادة الباشا
صفوت مين مدحت أفندى
صفوت أنا .. أنا
الوكيل هانى قلنا على كل حاجه
صفوت أنا معرفش حاجه .. أنا ماليش دعوة .. هانى اللى دبر الحكاية
جبران والشيكات برضه هانى اللى دبرها
صفوت أيوه
الوكيل خش يا عسكرى
العسكرى ( يدخل ) الشنطه أهه يا سعادة الباشا .. جبناها من منزل صفوت
الوكيل أيه رأيك يا صفوت باشا
صفوت أنا أنا
جبران وثقت فيك .. وأديتك كل حاجه .. لكن للأسف الطمع عماك ..بدال ماكنت تأخذ
حاجه مش بتاعتك أشتغل وأجتهد وأنت تكبر وتكبر
صفوت أنا أنا
( يقع على الكرسى ويشل تماما)
جبران أدى نهاية الإنسان .. اللى مش بيحمد ربه ..
الوكيل خذوه
( العسكرى وهانى يأخذونه للخارج )
جبران ياريت الإنسان يرضى بنصيبه .. لكن الإنسان عمره ما بيشبع لازم كل واحد يقتنع
باللى ربنا قسمهوله
( تنزل الستار الثانى ويظهر الملاك والشيطان وأدم)
أدم أديك أخذت جزائك يا أنسان .. أدى نهايتك .. ما كنت رضيت بنصيبك .. لازم يعنى
الطمع .. لازم الحسد ,, لازم
الشيطان الإنسان هو الإنسان ,, لا يغيره زمان ولا مكان
الملاك الإنسان هو الإنسان ,, لازم يفتكر ربه الديان
الشيطان الإنسان هو الإنسان ,, لازم يبقاله كيان
الملاك الإنسان هو الإنسان ,, لازم حياته تعيش فى أمان
أدم الإنسان ,, ليه بيصاحبك أنت بالذات يا شيطان
الشيطان لأنه فى الدنيا....وأنا الوحيد اللى عارف أنه عطشان
الملاك ليه يا أنسان فى الدنيا تعيش قلقان
أدم أنا صاحبت الشيطان ,, معلش أنا غلطان
الملاك وأخرتها معاك ايه يا إنسان
أدم من النهارده مش حايكون لى لسان
الشيطان أنا محتاجلك يا أنسان
أدم أبعد عنى يا شيطان
الملاك تعالى فى حضن ربك حاتلاقى الحنان
أدم أنا فى دنيا غريبة مليانه أحزان ...أنا فى دنيا عجيبه مالهاش أمان ...
أنا فى دنيا غير دنيتى ماليش فيها كيان
الملاك وبعدهالك يا أنسان وبعدهالك يا أنسأن
( يخرج الملاك )
أدم خذنى يارب فى دنيتك ,, أبعدنى عن الهوان
الصوت أعطنى يا أبنى قلبك
أدم قلبى وفكرى معاك ياربى بلا انتهاء
الشيطان وأنا وراك يا أدم .. مش حا أسيبك
( يختفى الشيطان )
أدم وبعدين معاك يا أدم ... واخرتها أيه يا أدم .. حاتفضل محتار ما بين الخير والشر.....
انت عايز أيه يا أدم ..عايز أيه يا ادم .عايز أبه يا أدم .

( يختفى أدم ويفتح الستارالثانى على
شقة صغيرة يجلس حنا ويقرع الباب )
حنا : أيوه ياللى على الباب ( يفتح الباب )
الزوجة : صحيت يا حنا
حنا : أيوة من نص ساعة .. أتأخرت ليه
الزوجة : معلهش كان عندى مشوار مهم.. ورحت السوق جبت شوية طلبات للبيت
حنا : طيب .. حمد الله على سلامتك
الزوجة : الحمد لله .. قوللى أخبارك أيه النهاردة
حنا : نشكر ربنا
الزوجة : وسعيد صحى ولا لسة زى عوايدة
حنا : زى ما هو .. سهر وشرب .. مافيش فايدة .. تعبت معاه من المناهدة
الزوجة : أنا مش عارف سعيد بيعمل كده ليه .. ليه ما يبقاش زى أخواته سامى وسهير
حنا : سامى وسهير .. ربنا يرجعهم بالسلامة
الزوجة : ومافيش جوابات جت النهاردة منهم
حنا : مافيش غير أخر جواب اللى جالنا منهم من أسبوعين
الزوجة : أن شاء الله حايطمنونا قريب .. بس أنت صليلهم
حنا : .. لكن عدم أتصالهم قالقنى عليهم
الزوجة : ما تخافش عليهم .. ربنا معاهم ,, دول ولاد ربنا ..وولاد ربنا ماحدش بيقلق عليهم
حنا : ياريت سعيد يكون زيهم
الزوجة: ربنا يهديه
حنا : مافيش فايدة .. طالما بيخرج من البيت ومش عارف بيروح فين ولا بيقعد مع مين
الزوجة : وهو فين دلوقتى
حنا : حايكون فين .. أهه نايم .. بسلامته راجع النهاردة وش الصبح .. ولما كلمته ماردش على
الزوجة : حا أقولك أيه.. غير ربنا يهديه وينور طريقة
حنا : أنا عملت معاه كل حاجة .. ما بخالتش عليه بأى شىء ..لكن يظهر ما فيش فايدة

يدخل سعيد وواضح عليه عدم النوم جيدا )
سعيد : صباح الخير
الزوجة : باباك زعلان منك يا سعيد .. حد يرجع وش الصبح .
سعيد : أنا حر .. أعمل اللى أنا عايزة .. اخرج وقت ما أنا عايز .. وأرجع وقت ما أنا عايز
ما حدش له حاجة عندى
الزوجة : ده أبوك ياسعيد .. ابوك اللى رباك
سعيد : أيوه ربانى .. لكن ما صرفش على زى ما صرف على أخواتى
الزوجة : أخواتك حبوا العلم .. وعلشان كدة أبوك وقف معاهم وعلمهم .. لكن أنت رفضت العلام
سعيد : خلاص .. يبقى يدينى فلوس بدال ما كان حايصرفها على علامى
حنا : أيوه أديك فلوس علشان تروح تسهر وتشرب بيها .. حرام عليك يا أبنى
سعيد : ومش حرام عليك تعامل ولادك بمكيالين
الزوجة : عيب يا سعيد تقول كده على أبوك .. أبوك بيحبك .. وأنت مش غاوى علام
سعيد : حانرجع ثانى نقول علام .. سيبنا العلام خالض .. يبقى نعيش الحياة بالطول
والعرض
حنا : يعنى أيه
سعيد : يعنى تدينى حقى وزى الفلوس اللى صرفتها على أخواتى ,, أعمل بيها اللى أنا عايزة
الزوجة : كده مش كويس ياسعيد يا أبنى
سعيد : أنا قلت اللى عندى وماعنديش كلام ثانى أقوله
حنا : وأنا ما عنديش فلوس لواحد يصرفها فى حاجات تغضب ربنا .. ياأبنى حا تخسر كثير
سعيد : أنا مش حا أخســر حاجة .. لكن أنا حا أتصرف أذا ما أعطينيش فلوســــى .. أنا
حا أعرف أخذها أزاى
الزوجة : لا .. أنت أتجنيت
سعيد : وأبويا باين عليه كبر وخرف
حنا : أخرس ( يضربه على وجهه بالقلم )
سعيد : بتضربنى يابابا .. طيب .. أنا بقى حا أحجر عليك
حنا : أخرتها يا أبنى تحجر على
سعيد : الظاهر التفاهم معاك ما ينفعش .. أنا حا أخذ كل حاجة عايزها بالعافية
بالقانون .بأى طريقة
( يخرج سعيد )
حنا : روح يا أبنى منك لله .. منك لله .. منك لله .. أه قلبى .. قلبى
الزوجة : مالك .. ياحنا
حنا : قلبى .. حاسس أنى خلاس نهايتى جت
الزوجة : ما تقوتش كده
حنا : لا.. أنا حاسس أنى تعبان .. تعبان قوى
الزوجة : أجيبك دكتور حالا
حنا : لا.. ما تتعبيش نفسك .. أنا شويه وحا أبقى كويس
الزوجة : شدة وحاتزول .. لابنا يهديه
حنا : عاجبك اللى بيحصل ده
لزوجة : لا طبعا .. الواحد مش عارف الأولاد بيعصوا ليه على أبوهم .. فى كدة
حنا : ياريت.. تتصلى بالأولاد فى أمريكا .. علشان ييجوا يشوفوا أخوهم ..وصل لحد
فين ... يلحقوه قبل ما يدمر كل شىء .
الزوجة : حا أتصل بيهم .. يمكن يقدرو يعقلوه
حنا : يار يت تخليهم ييجوا فى أول طيارة
الزوجة : حاضر.. ليه يا سعيديا أبنى ,.. ليه يا سعيد تعمل كده فى أبوك ..أبوك اللى
رباك .أبوك اللى صرف عليك دم قلبه ..ابوك اللى كان لك كل حاجة .. ..أبوك اللى
أستحمل صبر السنين وهوان الأيام .. علشان يربيك ويربى أخواتك.. يهون عليك
تعمل كده فى أبوك .. هى الرحمة يا أولاد راحت فين من قلوبكم .. الرحمة راحت
فين من قلوبكم الرحمة راحت فين
من قلوبكم .
( تغلق الستار الثانى ويظهر الملاك والشيطان وأدم )
الملاك : أيه اللى عملته ده يا أدم
الشيطان : أدم ما عملش حاجة .. أدم عايز يعيش حياته بالطول والعرض
الملاك : على حساب مين .. أبوه ولا أخواته
الشيطان : ما تفرقش كثير مع أدم .. هوه ده أدم ما تملاش عينه غير التراب

الملاك : وعلشان كدة .. لازم ادم يتحاسب
الشيطان : بتحاسب ثانى .. ليه .. خروج من الجنه .. ما فيش ملذات .. مافيش شهوات مافيش
سهر وعربدة مافيش .. مافيش مافيش .. كل ده وعايز أدم يتحاسب
الملاك : أيوه .. أدم لازم يكون مثال للطاعة لأوامر ربنا .. أدم لازم يكون فى فرق كبير بينه وبين
كل المخلوقات الاخرى .
الشيطان : دلوقتى ما تفرقش كثير .. ومعانا أحنا بالذات .. أحنا ما بندقش قوى
الملاك : قلت أيه يأد م
أدم : لو قلت أنا غلطان .. يبقى حا أعيش زى ما أنا عايش فى دنيا تخبط فى وأخبط فيها
ولو قلت أنا مش غلطان .. ولازم أخذ حقى .. يبقى حا أعيش دنيتى بالطول والعرض
وبفلوسى الكل حا يكون تحت طوعى
الملاك : وأخرتك يا أدم
أدم : لما ييجى وقتها .. يحلها حلال
الشيطان : هوه ده الكلام المظبوط
الملاك : وأنت عارف أخرتك أمته يا أدم
أدم : معرفش .. لكن على الأقل مش دلوقتى
الملاك : أنت عارف أنا جيت هنا ليه دلوقت
أدم : معرفش ..
الملاك : أنا جيت أقولك خلاص نهايتك
أدم : لا .. ما تكملش .. أنا لسه فى عز شبابى .. سيبنى أعيش .. سيبنى أعمل اللى فى
نفسى ..وأدينى فرصة أتوب فيها
الملاك : لا يا أدم .. ما ينفعش .. ما ينفعش تجمع بين الحياة الارضية والحياة السمائية ..
خلاص ما عندكش فرصة تختار خلاص الوقت
أدم : لا .. ما تكملش .. سيتى شوية أعيش
الشيطان : أديلة فرصة .. يعيش حياته وبعدين يتوب .. لسه العمر فيه كثير
الملاك : قلت أيه يا أدم
أدم : حا أقول ايه .. ما أنت قلت خلاص نهايتك .. وقلت خلاص الوقت
الملاك : لا يا أدم .. أنت قاطعتنى .. ما سمعتش بقية كلامى
أدم : هوه لسه فى كلام ثانى .. كنت حا تقول أيه ثانى
الملاك : أيوه كنت بقولك خلاص نهايتك قربت .. خلاص الوقت ما فضلش فيه ألا القليل
أدم : يعنى لسه فى فرصة
الملاك : كل واحد عنده فرصة .. فرصة واحدة يتوب فيها .. وفرصتك قدامك ما تضيعهاش
بس ياريت الكل يلحق فرصة وما يضيعهاش ..
الشيطان : عيش حياتك يا أدم
الملاك : الفرصة ما تجيش ألا مرة واحدة يا أدم
الشيطان : عيش وأتمتع بحياتك يا أدم
الملاك : ألحق فرصتك يا أدم
الشيطان : عيش حياتك يا أدم
الملاك : ألحق نفسك يا أدم
أدم : وأنا أعمل أيه .. أعمل أيه .. سيبونى أختار .. سيبونى أختار .. سيبونى أختار
( يختفى الشيطان والملاك وادم ويفتح الستار الثانى على المشهد السابق)
الزوجة : شد حيلك حنا
حنا : هما الأولاد لسه ماجوش ..
الزوجة : الطيارة جت من ساعتين .. زمانهم جايين فى السكة
حنا : ياريت ييجوا يلحقونى قبل ما أموت
الزوجة : لا موت ولا حاجة .. دلوقت سامى وسهير ييجوا وأول ما تشوفهم حاتبقى زى البومب
حنا : مش باين
الزوجة : ربنا يديبك الصحة.. ويخليك لأجل ولادك
حنا : ولادى .. وأنا عندى أبن عاصى .. ممغص على حياتى .. وأخرتها عايز يحجر على
الزوجة: ده كلام بيقوله .. أنت تصدق أن أبننا يعمل كده
حنا : أصدق .. طول ما هو بعيد عن ربنا أصدق... طول ما هو بعيد عن الكنيسةأصدق .طول ما
هو بعيد عن الأعتراف والتناول أصدق .
الزوجة : ربنا يهدية ويرجعة ثانى فى أحضاته
حنا : يارب .. أنت عالم بحالى .. وعالم قد أيه أنا ضحيت بكل شىء من أجل ولادى
الزوجة : وعلشان كده.. ربنا مش حا يتخلى عننا
حنا : ربنا عمره ما تخلى عننا يوم .. لكن ولادنا بيتخلوا عننا لما نكبر ونعجز
الزوجة : أزاى تقول الكلاك ده .. حايرجع وحا يتأسف أنا عارفه أبنى كويس
حنا : ما أنا خلاص كبرت وخرفت على رأى أبنى سعيد
الزوجة : وبعدين معاك يا حنا .. لازم يكون عندك ثقه فى ربنا .. يهديه ويرجعه لصوابه
( قرع على الباب )
حنا : أفتحى الباب.. باين الاولاد وصلوا
الزوجة : حاضر ( يفتح الباب ويدخل الاولاد سامى وسهير )
سامى : ماما .. بابا
سهير : ماما حبيبتى .. بابا
حنا : ( يحتضن أولاده ) أولادى .. حمد لله على السلامة
سامى : خير يا بابا فى أيه .. فى أيه يا ماما
سهير : قلقتنا عليك يا بابا
حنا : ما تقلقوش على .. أنا مش مهم .. بل أقلقوا على أخوكم .. أخوكم اللى ضاع
سامى : سعيد .. ماله سعيد يا بابا .. ماله ياماما
سهير : قول يا بابا ... أخويا سعيد جراله حاجة.. حصل حاجة لأخويا يا ماما
الزوجة : أخوكو بخير .. بس مزعل بابا شوية .. ربتا يهديه
سامى : قول يابابا أيه الى حصل
حنا : أقول أيه يا أولادى .. سعيد خلاص ضاع .. سعيد ما بقاش واحد مننا .. سعيد ساب
البيت وأتلم على أصحاب السوء .. سعيد بتاع زمان .. ما بقاش سعيد بتاع
النهاردة ..سعيد عايز فلوس يصرف ويسهر ويشرب .. ولما قلته ده غلط .. لما وقفت له ..
عارفين عايز يعمل ايه .. عايز يحجر على .. أبنى عايز يحجر على
سهير : سعيد يعمل كده فى باب .. مش معقول
سامى : أنا اللى سافرت وأطمئنيت بوجود سعيد معاك.. يراعيك ..يخلى باله منك .. يعمل كده
الزوجة : أخوك يا سمير .. عايز اللى يفهمه .. عايز اللى يوعيه
سامى : ما تقلقيش يا ماما .. أنا حا أروح أدور عليه .. حا أقلب الدنيا لحد ما ألآقيه ..
لازم يرجع البيت من ثانى ..لازم لازم لازم .
الزوجة : خايفة يا أبنى يكون الاوان فات .. وقلب أخوك من القسيه مات
سامى : ولو ياماما .. لازم يعود .. لازم يعود .. لازم يعود
( يخرج سامى مندفعا )
حنا : ربنا معاك يا أبنى .. وما ترجعش الا ومعاك سعيد أبنى
سهير : حايرجع يا بابا .. حايرجع .. حا يرجع .. حا يرجع
الزوجة : أنت فين يا سعبد .. الكل قلقان عليك .. غايب عن بيتك .. وحنان البيت حواليك
حنا : وأنتى يا سهير .. عقبال ما أخواتك يرجعوا .. شوفى أيه عندنا نجهزة .. علشان لما
يرجع سعيد أكيد حا يكون جعان .. ووضبى فرشته .. علشان لما يرجع أكيد عايز
يرتاح
سهير : طول عمرك حنين يابابا
( تخرج سهير )

حنا : أن ماكنش الأب حنين على ولاده .. مين حايكون حنين عليهم... ده ما فيش أب فى
الدنيا ممكن ولو لحظة واحده يزعل من ولاده أبدا أبدا .. ده أنت أبنى .. ومهما تكون
قاسى .. حاتلاقى قلبى حنين عليك ..ماهو ده قلب الأب ,, يساع همومك يا أبنى ..
يساع مشاكلك .. ويحتويك لما تغضب .. أرجع يا سعيد يا أبنى .. تعالى فى حضنى ..
مش حاتلاقى حضن يساعك أو يستحملك غير حضن أبوك .. مش حاتلاقى حد يخاف
عليك غير أبوك .. مش حاتلاقى الأمان والسلام غير فى بيت أبوك .. صدقنى با أبنى كل
حاجة ممكن تلاقيها فى أى مكان .. لكن الحب الحقيقى والأمان والأستقرار مش حا
تلاقيه غير جوه بيتك .. حافظ يا ابنى على بيتك .. وأوع تظن ولو لحظة واحده أن الأب
ممكن بغضب من ولادة .. ولا يتخلى عنهم لحظة واحدة .. مهما كانوا ولو كانوا
قاسيين ..مهما كانوا ولو كانوا قاسيين
.الزوجة : طول عمرك حنين وقلبك على ولادك... طول عمرك. ما بخلتش عليهم أبدا .. اللى عاوز يتعلم علمته واللى مش غاوى
علام علمته صنعة يعيش بيها .. مهما كانوا يعصوا كان قلبك كبير ..وعمرك ما فرقت بينهم أبدا أبدا أبدا
حنا : أيوه.. دول كلهم ولادى
الزوجة تعالى يا حنا أستريح
حنا كش ممكن أستريح ألا بما يعود سعيد
سهير : ( تدخل سهير مسرعة ) با با ماما .. سامى جاى ومعاه أخويا سعيد
حنا : الحمد لله .. اشكرك يارب
الزوجة : الحمد والشكر ليك يارب
( يدخل سعيد وخلفه سعيد)
سعيد : بابا ... سامحنى
حنا : أبنى ... تعالى فى حضنى
سعيد : أنا أسف يا بابا ... الشيطان غوانى
حنا : المهم رجعت ثانى يا أبنى فى حضنى
الزوجة : نورت البيت يا ضنايا
سهير : أخويا سعيد
سعيد : سهير أختى ,, حمد لله على سلامتك
سامى : بابا .. سعيد عرف غلطته خلاص .. سامحه يا بابا
حنا : يا أبنى .. أنا مسامحه من زمان .. ما فيش أب بيزعل من ولاده.. مهما كانوا ولو كانوا
قاسيين
سعيد : ما تزعلش منى يا أحسن أب
حنا : خد يا سعيد
سعيد : ايه ده يا بابا
حنا : ما أنت عارف يا أبنى .. أنا طلعت على المعاش .. وديه مكافأتى .. خذها يمكن
ترضيك
سعيد : اللى يرضينى يا بابا رضاك على
حنا : أنا طول عمرى راضى عليك .. خذ يا سعيد
سعيد : أنا مش عايز حاجة
الزوجة : خذ من بابا يا سعيد .. ما تقولش لا
سعيد : الفلوس ديه مش من حقى أنا لوحدى .. ديه من حق أخوانى كمان
سامى : أنا وأختك مش محتاجنها .. أنت فى أحتياج اليها أكثر مننا
الزوجة : خذ يا سعيد يا أبنى .. وشوف حا تعمل أيه .. الفلوس وأهيه معاك
سعيد : فلوس .. معايا .. حا أعمل بيها أيه .. مش عايزها .. أنا مش عايز فلوس ..أنا عايز
أمان وسلام ..والأمان والسلام مشممكن ألآقيه غير هنا .. ارجوكو كلكم تسامحونى ..
أنا خلاص عرفت غلطتى ..
( يحتضن سعيد أباه )
( يغلق الستار الثانى ويظهر الملاك والشيطان وأدم )
أدم : منك لله يا حواء لولاكى ما كنت خرجت من الجنه.. لازم يعنى تأكلينى من التفاحة
الملاك : كان ممكن تقولها لا
الشيطان : ما حدش يقدر يقول لحواء لا .. ديه حواء
الملاك : وأنت أدم .. ربنا عطاك من العقل والرزينه علشان
أدم : لكن حواء بتغريتى .. بتشدنى اليها .. بتسحرنى .. بتجننى..
الشيطان : وأنا حا أسلط عليك حواء .. وتعمل معاك اللى مش قادر أنا أعمله
الملاك : أيه زهقت من أدم وحا تحول على حواء
الشيطان : أهه نضيع وقتنا .. بدال ما نقعد من غير شغل .. أحنا ورانا أيه .
أدم : أيوه .ياريت تبعد عنى شوية .. وتشوف حواء بتعمل معايا أية...
الشيطان وماله حتنشوف حواء ..لكن برضة مش حا أسيبك يا أدم .. راجعلك ثانى يا أدم .
راجعلك ثانى يا ادم
الملاك مافيش فايدة فيك .. الشر دايما ماليك .. وأنت السبب يا إنسان .. أنت السبب يا
إنسان.. أنت السبب يا إنسان

( يخرج الجميع ويفتح الستار الثانى على شقة فى مبنى
البنات المغتربات ليديا و ليلى و منال يمرحون فى الشقة ))
هناء : صباح الخير يا بنات
ليدبا : أهلا هناء .. تعالى أقعدى معانا
ليلى : أحنا عاملين حفلة النهاردة بمناسبة عيد ميلاد منال
هناء : ( لمنال ) كل سنة وأنت طيبة يا منال
منال : ميرسى
ليلى : أيه قلتى أيه يا هناء
هناء : معلش مقدرش علشان عندى مذاكرة ,, عايزة أراجع محاضرة النهاردة
ليديا : طول عمرنا بنذاكر خدنا أيه
هناء : معلش سامحونى ,, فرصة ثانية .. أكون عامله حسابى
منال : ياى ... تعالى معانا .. كل شىء على حسابى
هناء : لا معلش ,, أعذرونى
ليلى : هى كده بنت نكديه ..
ليديا : يا حبيبتى لازم تعيشى الحياة بالطول والعرض ..
هناء : أظن أحنا جينا هنا فى الغربه علشان نتعلم .. وأهالينا دفعوا من قوتهم مصاريف الكلية
ومصريف البيت الى أحنا فيه
ليلى : أيوه يا حبيبتى .. لكن الواحد لازم يفك عن نفسه شوية .. مش كده

منال : ياى .. البنت ديه معقدة
ليديا : فكيها يا حببتى شوية .. علشان ربنا يفكهالك
هناء : أنا كده .. وياريت تسيبونى فى حالى .. أكون شاكرة جدا ليكم
منال : ياى .. أنا عارفه قاعدين معاها أزاى ديه ..
هناء : تقدرى تقوللى يا منال .. أنت بقالك كام سنه فى الكلية ولسه فى سنة ثانية
منال : أربع سنين .. وفيها أيه .. أنا أستعجل ليه .. ورايا أيه .. هنا عايشه حياتىزى ما أنا
عايزة ..وكل طلباتى مجابه
هناء : طبعا كل طلباتك مجابه .. مش والدك بيبعت لك كل أول شهر فلوس كثير يبقى ناقصك
أيه ..
ليدبا : وده يزعلك فى أيه .. على الأقل شايفه طلباتنا .. وربنا يخللنا باباها .. ياللا يا جماعة
نروح نشوف حته نهيس فيها ..ونبعد عن الجو الكئيب ده
ليلى : هوه ده الكلام ياللا يا بنات باى
ليديا : ذاكرى يا حبيبتى علشان تنجحى باى
منال : ياخسارة .. كان نفسى تبقى معانا .. مالكيش فى الطيب نصيب باى
( يخرجون جميعا ويغلق الستار الثانى )
الشيطان : فرصة ثلاث بنات جاهزين .. أروح أشوف بقى شغلى
الملاك : ثانى .. مش أتفقنا نسيب الإنسان يعمل اللى عايزة بدون تدخل منى ولا منك
الشيطان : ايوة أتفقنا .. لكن ما أتفقناش على حواء
الملاك : ما هى حواء هى أدم برضة
الشيطان : أزاى .. أدم حاجة وحواء حاجة ثانيه
الملاك : أنت نسيت أن حواء حته من ضلع أدم
أدم : أنتى فين يا حواء .. أنتى فين يا حواء
الشيطان : مالك يا أدم .. عايز حواء ليه
أدم : حواء هى دنيتى .. حواء حته منى .. مش لاقيها .. ضاعت منى
الملاك : ضاعت منك أزاى
أدم : كانت معايا ملازمانى .. فى الحزن معايا .. فى الفرح معايا .. فجأة ملقتهاش
جنبى ..
الملاك : عملت أيه يا أدم فى حواء .. عملت ايه
أدم : طلباتها كثير ما بتخلصش ... تعبت من كثر طلباتها .. ولما قلتلها مافيش ما معاييش ..
سابتنى وراحت لغيرى
الشيطان : سيبك منها ... دور على حواء غيرها ..
أدم : مقدرش مقدرش
الشيطان : يا أدم .. ما تضعفش .. أنت برضة أدم وهى حواء .. ولا نسيت
الملاك : يا أدم .. دور على حواء ما تتخلاش عنها .. خدها فى حضنك ما تضيعهاش
أدم : هى اللى سبيتنى .. هى اللى سبيتنى
الملاك : سابتك لما أستغنيت عنها .. لما فكرت فى حواء غيرها ..
ادم : ماهى كمان دورت على أدم غيرى .. ومافيش حد أحسن من حد
الشيطان : اهه كده الكلام .. مافيش حد أحسن من حد
الملاك : ماهى ديه فرصتك .. علشان تحقق رغباتك فى أفعال الشر
الشيطان : أنا ما رغمتش حد يجينى ,, يمشى ورايا ,, كلهم بيجوا برغبتهم
الملاك : ما أنت اللى بتهيء لهم الشر .. أنت محوطهم بإغراءات مالهاش حدود
أدم : كفاية على متاعب الدنيا وهمومها .. لكن حواء مزوداها حبتين .. بتعمل اللى هى
عايزاه سواء كان برغبتى .. او بدون رغبتى .. أنا مش عايزها ..أنا مش عايزها.. أنا
مش عايزها
( تفتح الستار الثانى ونفس المشهد وهناء بمفردها تستذكر دروسها
تدخل عليها ليديا فى حالة أنبساط شديد )
ليديا : مساء الخير .. يا قمر ( تغنى ليديا )
هناء : ياه دأنت مبسوطة قوى
ليديا : و ما أنبسطش ليه .. أما كانت حته سهرة جنان
هناء : أنت عارفة الساعة كام دلوقت
ليديا : أنا ما يهمنيش الساعة كام .. الحياة يا حبيبتى ما تتقاسش بالساعة
هناء : أمال تتقاس بأية
ليديا : بالأوقات الجميلة ,, بالسهرات الرائعة
هناء : عمر الحياة ما تتقاس بطريقتك ديه
ليديا : يا حبيبتى عيشى حياتك أتمتعى بيها ... ما حدش واخذ منها حاجة
هناء : يعنى أنت عاجبك الحياة الى أنت عايشاها ديه .. كل يوم سهر .. وياريته سهر مفيد
ألا كله كلام فارغ
ليديا : أيوة بوظيلى الدماخ اللى أنا عملاها .. أنا حا أدخل أنام .. باى
( تخرج ليديا )
هناء : ياخسارة وميت ألف خسارة
تدخل منال فى حالة فرح شديد )
منال : ياى .. أنت لسه صاحية يا هناء
هناء : أهلا شرفتى ..
منال : أيوة .. أتأخرت شوية .. أصل كنت بعمل شوبنج
هناء : شوبنج بعد منتصف الليل
منال : أيوة .. المحلات كلها فاتحة .. هو فى حد يابنتى بينام من المغرب غيرك
هناء : وياترى أشتريتى أيه النهارده
منال : فستان سهرة أنما أيه .. ولا الجزمة اللى جبتها جنان
هناء : وبكام ياترى جبتيهم
منال : الفستان بخمسميت جنية .. والجزمة رخيصة بمائة وخمسون جنية بس .
هناء : بزمتك مش حرام عليك .. لما وأنت فى الجامعة ووالدك بيصرف عليك تجيبى
الحاجات الغالية دية ...
منال : الله .. هو أنا مش لازم أعيش حياتى .. وأتمتع بالدنيا
هناء : أنت لسه صغيرة والحياة لسه قدامك .. مستعجلة على أيه
منال : أنا كده يا حبيبتى .. وحا أفضل كده
هناء : أنت حرة .. لكن حاييجى اليوم وتندمى على كل ده
منال : أندم على أيه ..
هناء : على ضياع فلوس بباكى اللى بعتهالك للعلام .. مش لللبس والمظاهر الكدابة
منال : هو بابا حاسس بحاجة .. بابا غرقان مع مراته .. من يوم ما ماتت أمى وهو بيلبى
كل طلباتى علشان أسيبله البيت لمراته .. يعنى كل واحد بيعمل لمصلحته
هناء : وطبعا مش فارقة معاكى ..
منال : أهه كدة فهمتينى
هناء : أنا لا فهمتك .. ولا عايزة أفهمك
منال : أنت حرة .. باى
( تخرج منال )
هناء : يارب أسترها مع ليديا ومنال .. ليديا اللى عايشة حياتها بالطول والعرض سهر
وشرب ... ولا منال يارب اللى عايشة على المظاهر الكدابة ,,.. قبل ما يضيعوا بسبب
تصرفهم الطائش .نفسى أعرف فين أبوهم ,, فين أمهم .. أزاى مش بينبعوكم و أزاى سا
محين ليكم بالغربة . من غير ما تكون عنيها عليكم .. واذا كان أهاليكم بتثق فيكم .. ليه
ما تكونوش قد المسئولية .. ليه ما ترفهوش راس ابوكم ..الأب بيتعب ويكد ويشقى
وانتم هنا ولا حاسين بحاجة .. حا اقول ايه ولا أبه .. الغاط فيكم ولا فى
أهاليكم .. لا .. لا .. الغلط فينا أحنا .. أحنا اللى ممكن نمشى شح ,, ,احنا اللى
ممكن ننساق وراء الغلط .. ومافيش فايدة .. ومافيش فايدة .. يا خسارة .. با خسارة وميت ألف خسارة .. يا خسارة وميت ألف خسارة .

( تدخل ليلى فى حالة بكاء وضياع شديد )
هناء : ليلى .. ليلى .. مالك يا ليلى .. ردى على
ليلى : خلاص أنا ضعت .. ضعت .. أنتهيت .. مستقبلى كله ضاع
هناء : أيه بس اللى حصل .. قوليلى .. فهمينى
ليلى : أفهمك أيه ما كل شىء راح .. حياتى خلاص مابقاش لها قيمة
هناء : ياساتر يارب .. أستر يارب ..
ليلى : أنا خلاص .. أنا حا أموت نفسى وأخلص
هناء : أنت أتجنيتى .. قوليلى ايه اللى حصل
ليلى : لا .. لا .. لا
( يغمى عليها )
هناء : يا ليديا .. يا منال .. ألحقونى .. تعالوا بسرعة
( تدخل ليديا ومنال مسرعين )
ليديا : فى أيه مالها ليلى
منال : ليلى ,, ليلى .. ردى على
هناء : مش عارفة .. قالت كلام مش فاهمة تقصد أيه .. وبعدين كانت عاوزة تموت نفسها
وشوية وأغمى عليها
ليديا : ليلى .. ليلى .. ردى على
منال : خدوا الريحة ديه يمكن تفوق
هناء : ليلى .. ليلى .. يارب .. يارب ,, ما تسبناش لوحدينا يارب
ليلى : ( تفوق قليلا ) خلاص .. خلاص
ليديا : أيه هو اللى خلاص ..أنتى كنتى عنده النهاردة
ليلى : أيوة ويارتنى ما كنت رحت .. ياريت كانت رجلى أنكسرت وما كنتش رحت
منال : فهمينا أيه اللى حصل
هناء : مين ده اللى راحتلة .. مين دة يا ليديا
ليديا : البوى فرند بتاعها
هناء : بوى فرند .. يعنى أيه
منال : الولد بتاعها
هناء : ولد .. هى عندها ولد بتاعها
منال : أيوه كل واحده فينا عندها بوى فرند .. هو أنت ما عندكيش
هناء : أخرسى ... أيه اللى أنا بأسمعة ده .. أنا مش مصدقة ودانى .. بقى أنتم كده.. طيب
ليه .. ممكن تفهمونى ليه .. ليه .. ليه ..
ليلى : أعمل أيه دلونى أعمل أيه,, أنا ضعت خلاص .. ضعت خلاص
منال : هو .. هو
ليلى : أيوة .. ايوه .. ايوه
ليديا : لا ما توصلش لكده .. نسهر نضحك نشرب .. لكن
هناء : لكن أيه .. ما الشرب والسهر .. هى ديه البداية ,, هى ديه البدايه ..وأديكوا شايفين
النهاية ,, عاجبكم كده .. عاجبكم كده .. عاجبكم كده
ليلى : أنا الغلطانه .. أنا اللى رحتله برجليا .. أنا حبيته .. لكن هو غدر بحبى ... ماكنتش
أعرف أنه كده .. ولما حصل اللى حصل .. رمانى ولا كأنه يعرفنىأنا أستاهل كل اللى
يجرالى .. أنا مجرمة .. مجرمة .. مجرمة ,
ليديا : وأنا كمان غلطانة .. لأننى السبب .. أنا اللى عرفتها عليه .. أنا اللى قدمتهاله أنا
أتغريت فيه كان فى يوم معايا وسابنى ..كان لازم من ساعتها ما أثقش فيه وما أقدمش
صاحبتى له .. كان لازم أحذرها منه .. أنا السبب أنا السبب أنا السبب
منال : وبرضة أنا كمان غلطانة .. أنا ساعدتها بفلوسى علشان تروحله بأحسن لبس..ساعدتها
بفلوسى علشان تغريه .. وادى الفلوس بقيت نقمة علينا كلنا .. ضاعت ليلى مننا وياترى
مين عليه الدور .. الدورعلى مين .. حاسبوا لا الدور ييجى عليكم .. خلوا بالكممن
ولادكم .. خلوا بالكم من ولادكم .. خلوا
بالكم من ولادكم .
هناء : ياما حذرتهم .. ياما قلتلهم أن اللى بتعملوه غلط .. ما حدش سمعنى .. ماحدش صدقنى
حاولت معاهم كثير .. لكن الشيطان كان أقوى منى .. هما راحوا برجليهم لطريق
الشر..الشيطان ماجاش عندهم .. هما اللى راحوله بأرادتهم .. ياخسارة وميت ألف
خسارة .. ياخسارة وميت ألف خسارة .. يا خسارة وميت ألف خسارة .
( يغلق الستار الثانى ويظهر
الملاك والشيطان وأدم )
الشيطان : وبعدهالك يا حواء .. حا تتعبنى ولا أيه .. لكن مش حا أسيبك يا إنسان
الملاك : هو ما فيش فايدة فيك .. مش ناوى تسيب الإنسان فى حالة
الشيطان : خلاص كانوا كلهم فى أيدى ..
الملاك : لكنهم تابوا .. ورجعوا بعد عصيانك لهم..
الشيطان : أنا مش عارف ليه الإنسان .. بعد ما أديله كل حاجه .. يغير رأيه
الملاك : لأنه هو ده الصح .. خلاص أدم عرف الأعيبك .. ياريتك بقى تسيب أدم فى حالة
الشيطان : مقدرش .. مقدرش .. ده أنا أموت .. تقدر تستغنى عنى يا أدم
أدم : مش عارف .. ساعات بحس ,, أن فى حاجات كثيرة نثصانى .. وأنت الوحيد اللى
تقدر تلبهالى .. وساعات بحس أن القرب منك نار نار نار
الملاك : أختار يا أدم دنيتك الأرضية مع الشيطان .. أو دنيتك فى السماء مع المسيح
أدم : مش عارف .. مش عارف .. الأختيار صعب .. والمقارنه أصعب ..
الشيطان : أنا تحت أمرك .. أطلبنى تجدنى بين أيديك .. وما تبعدش عنى با أدم ,, وأن
بعدت أنا وراك ..
حاتروح منى فين يا أدم .. حا تروح منى فين يا أدم ,, حا تروح منى فين يا أدم .
الملاك : حاسب يا أدم .. مهما يطول عمرك على الأرض .. حاينتهى مهما تأخذ من
الدنيا حاتطلع منها وأيديك فاضية
الملاك : ما فيش فايدة فيك الشر جواك .. الفساد مالى عينيك .. ملعونة الأرض بسببك
الصوت أنت فين يا أدم .. أنت فين يا أدم
أدم أنا هنا .. فى أرض الشقاء والراحة .. أنا هنا فى أرض العذاب والسعادة .. أنا هنا
فى أرض العبودية والحرية .. أنا هنا فى أرض السلام والحرب .. أنا هنا فى أرض
المتناقضات .. أرض النفاق .. أرض ملعونة ملعونة ملعونة .
الصوت لا تنسى الوصايا العشرة يا أد م
أدم أعلم ياربى وصاياك
الصوت ( تقال الوصايا العشرة كاملة( لا تزن ... لا تقتل .. لا تسرق .. لا تشهد بالزور /
أكرم أباك وأمك .. ..... الخ )
..... وأثناء سماعها يردد أد م جملتهالأخيره مابين كل وصية تقال )
أدم سأنفذ وصاياك ياربى .. سأنفذ وصاياك ياربى .. سأنفذ وصاياك ياربى .
( حتى تنتهى الوصايا كاملة )
( ســــــــــــتار )

» مسرحية: الحل إيه؟؟! لاطفال مدارس احد
» مسرحية معلم اولاد الملوك
» تمارين لدقة ممثل المسرح
» المسرح الأسود
» تمارين لممثل المسرح (1)