مسرحية معلم اولاد الملوك

معلم أولاد الملوك
بنت 1: صباح الخير يا مريم انتى طالعة معانا الرحلة.
بنت2:صباح النور يا مرثا. ايوة متعرفيش مرشدة الرحلة فين؟
المرشدة:باريت يا جماعة نتجمع بسرعة عند الأوتوبيس بسرعة برنامج الرحلة النهارده هنروح أديرة وادي النطرون
وهناك هنبدا نشرح كل حاجة
} يدخلون خلف ستارة بيضاء ثم تفتح الستارة على الدير {
بنت3:الله المكان ده جميل اوى
بنت4: هو إحنا فين بالضبط؟
المرشدة:انا هقول لكم احنا دلوقتى في دير البراموس وبالتحديد في كنيسة السيدة العذراء الأثرية
بنت5:طيب ممكن تحكى لنا حكاية واحد من رهبان دير البراموس
المرشدة: ها حكى لكم عن معلم من المعلمين العظماء
بنت1:لكن احنا عايزين نعرف حكاية راهب مش معلم
المرشدة:مفيش مشكلة ملهو الراهب كان في الأول معلم وفيلسوف عظيم في روما لدرجة أن الملوك كانوا بيبعتوا له علشان
يعلم أولادهم وفضل على الحال ده لمده 40 سنة واشهر الملوك اللي علم أولادهم هو الملك ثيؤدسيوس الكبير
بنت2: طيب هل كان لأسرته دور في تربيته
المرشدة: أكيد طبعا فحكاية ميلاده متختلفش كتيرعن اسحق، شمشون، صموئيل النبي وكمان يوحنا المعمدان
لان أبوه وأمه مكنش عندهم أولاد وفضلو يصلوا لربنا يرزقهم أولاد فأعطاهم ولد وعلموه تعليم مسيحي لحد لما
بقى رئيس شمامسة وكان محب لقراءه الكتب المقدسة والدر اسه عموما لحد لما بقى معلم أولاد الملوك
بنت3: وإيه نوع الدر اسه اللي كان القديس يعلمها لأولاد الملك ثيؤدسيوس الكبير
المرشدة: بالإضافة لتعليم الأولاد اللغات والعلوم المختلفة منساش يعلمهم مبادئ الخلاص النافعة ومعرفة ربنا يسوع المسيح
وده كان قصد الملك ثيؤدسيوس الكبير من تعليم اولاده لأنه كان عايز القديس يعلم أولاده حتى يربحوا الحياة الأبدية
من خلال تنفيذ الوصايا بتاعه الإنجيل اللي كان القديس بيعرفهم عليها
بنت4: أمال إيه اللى جابه هنا في دير البراموس ؟
المرشدة:المعلم ده كان دايما بيقول "عرفني يارب ازاى اخلص " فسمع صوت من السما بيقول " اهرب من الناس وانت
تخلص"فسافر إلى الإسكندرية فى مركب وبعدين مشى فى البرية لحد لما وصل لوادي النطرون
بنت5: وليه اختار القديس ده مصر بالذات علشان يترهبن فيها ؟
المرشدة:لان مصر فى الفترة دي كانت معروفة برهبانها اللى كانوا دايما بيحافظوا على الإيمان المستقيم زى مثلا القديس
مكاريوس صاحب دير أبو مقار هنا برده فى وادي النطرون وزى القديس يوحنا القصير، الأنبا اشعياء وغيرهم
من الآباء أبطال الإيمان وكان القديس اللى بنتكلم عنه دايما بيقول انه اتعلم كل العلوم الرومية واليونانية لكن
ألفا فيتا اللى بيعرفها المصريين انا لسه بتعلمها وكان قصده طريق الفضيلة
بنت1: بس أنتي لسه مقلتيش لحد دلوقتى الراهب ده اسمه إيه ؟
المرشدة: اسمه الأنبا ارسانيوس معلم أولاد الملوك
بنت2: انا اشتقت اوى اسمع باقي حكاية الأنبا ارسانيوس
المرشدة: تعالوا نقعد فى مكان وان ها حكى لكم باقي الحكاية
رئيس الدير:يارب ارشدنى وعرفني اعمل إيه فى أمر أرسانيوس ده لسه راهب جديد ومش عارف نظام الدير. ربنا يدبرها من
عنده
راهب بولس: سلام يا أبى
: سلام يا أبونا بولس انا هطلب منك طلب وأرجوك انك تستحمل علشان خاطر ربنا.انا عايزك تقعد جنب أبونا
ارسانيوس وتنقى الفول الأبيض تأكله وتسيب الفول الأسود والمسوس
راهب بولس:أمرك يا أبى
رئيس الدير: يلا يا اخواتى علشان نقعد نأكل مع بعض
} يدخل الرهبان ومعهم أطباق ويجلسون كلهم على الأرض {
رئيس الدير:بسم الأب والابن والروح القدس اله واحد آمين. اللهم اجعلنا مستحقين أن نقول بكل شكر يا أبانا الذي فالسماوات
} يبدأ الرهبان فى تناول الطعام {
رئيس الدير:إيه اللى بتعمله ده يا بولس (يضربه على وجهه )
أنت ازاى تنقى الفول الأبيض لنفسك وتسيب الأسود لإخوتك هي دي أصول الرهبنة
ارسانى: سامحني يا أبى سامحني يا اخويا.الألم ده انا اللى استاهل اخده مش حد تانى

رئيس الدير:وانت مالك يا أرسانيوس هو أنت عملت حاجة؟
ارسانى:انا كمان كنت بنقي الفول الأبيض واسيب الأسود سامحوني .سامحوني كلكم
(يقوم وهو بيتكلم ثم يسجد أمامهم)
رئيس الدير:"يطبطب عليه ويقول" ربنا هو اللى بيسامح الكل يا ارسانيوس
(يخرج الجميع من المسرح وهم حاملين الأطباق ثم تدخل المرشدة)
المرشدة:على فكرة يا بنات موقف الأنبا ارسانيوس ده أتكرر مرة تانية لكن بشكل تانى لأنه لسه كان فاكر حياه الملوك اللى
كان عايش فيها وحصل فى يوم. (تخرج)
راهب زينون:الجو حار جدا النهاردة وأنا تعبت اوى فى قطع الخوص.لما اقعد أكل لقمة العيش دي. بس انا ريقي ناشف ومش قادر ابلع زانا أجيب شوية ميه وملح وابل فيهم العيش علشان اقدر أكل
(يكون معه قطعة قماش فيها العيش ويخبيه عند مجئ الراهب الكبير)
راهب كبير:إيه أخبارك يا زينون يا بنى وإيه أخبار.....إيه اللى خبيته ده يا زينون
زينون:سامحني يا أبانا علشان خاطر محبه السيد المسيح انا دخلت البرية أأقطع خوص والحر كان شديد لدرجة أنى مش قادر ا بلع ريقي فبليت العيش الناشف فى ميه وملح علشان اقدر أكله
(يأخذ الراهب الكبير الطبق ويضعه على الأرض)
راهب كبير:يا كل اخواتى فى الدير.يا ارسانيوس. يا كل الرهبان تعالوا شوفوا أخوكم زينون
"يدخل ارسانى ،بولس"
ارسانى ،بولس:خير يا ابى فى ايه؟

راهب كبير : اخوكم زينون كان النهارده بيجمع خوص .وعدين ريقه كان ناشف.....(هنا يحدث كلام صامت ويفكر ارسانى بصوت عالى)
ارسانى : إذا كان ابانا عاتب اخويا زينون العتاب ده علشان اكل العيش بميه وملح امال لو عرف انى بعمل نوعين من الاكل
هيعمل معايا ايه ؟

راهب كبير:يا اخى انت سبت كل النعيم والمال اللى كان عندك وجيت الدير حبا فى الرب وخلاص نفسك. ازاى دلوقتى بتفكر فى
تمتع نفسك بالاكل .لوكنت عايز تعيش علشان تاكل يبقى الدير مش مكانك يا اخى
ارسانى:يا ابى انا عايز اعترف قدام ربنا وقدامك وقدام كل اخواتى انى كنت بعمل نوعين من الاكل لانى مش متعود على اكل
الدير ولمل سمعت كلامك دلوقتى حسيت انى غلطان وكان لازم اعترف .ارجوك سامحنى علشان خاطر المسيح
راهب كبير: (يضع يده عاى ارسانى وزينون)ويقول.....ربنا يسامحنا كلنا ويقويكم فى جهادكم يا اولادى 0يخرج الجميع)
المرشدة:واتعلم ارسانيوس ازاى تكون الحياة فى الديرواحنا كمان نتعلم من الموقف ده اهمية الصوم وخصوصايوم الاربعاء
والجمعة لكن عدو الخير مش بيسب الرهبان يتمتعوا بالحياة مع الرب يسوع وفى يوم......
(ارسانى راكع يصلى فى هدوء فى قلايته)
ارسانى:سبحوا الرب ياجميع الامم ولتباركه كافة الشعوب لان رحمته قد ثبتت علينا وحق الرب يدوم الى الابد هليلويا
الشيطان:ايه الصوت الجميل ده .ملاك يا ارسانى بيسبح
ارسانى: انت مين وعايز ايه؟
الشيطان:مش مهم انا مين.المهم انت.ايه اللى انت عمله فى نفسك ده. انت نسيت انت مين وابن مين .يامعلم اولاد الملوك
يبقى ده حالك .يامسكين!! فين ايام زمان لما كنت لابس الحرير وعايش فى العز:دلوقتى بقيت غلبانبيزلوك على اللقمه
الناشفة؟ (يضحك ساخرا) يلا قوم معايا وسيبك بقى من عيشة الذل والفقر اللى انت فيها...يلا معايا..انا خايف على
مصلحتك.
(فى هذا الوقت يحاول ان يسد اذنيه )
ارسانى :من الاعماق صرخت إليك يارب .يارب استمع صوتى لتكن اذناك مصغيتين لصوت تضرعى
الشيطان:آه آهغلبتنى يا ارسانى بالمزامير. حرقتنى يا ارسانى .ااااالحقونى
ارسانى :"يرشم الصلي ويقول" يبتهج قلبى بخلاصك.اسبح الرب المحسن الى وارتل لاسم العلى هليلويا
المرشدة:فى الحقيقة كانت تجربة صعبة لكن ربنا مش بيخلينا نتجرب اكتر من ما نحتمل بس الحكاية لسه
مخلصتش. فى يوم زارت الدير سيده رومانيه يا ترى ليه؟
راهب1: (يدخل البابا والراهب من جهتين مختلفتين ويعمل مطانيه)
راهب1: ياقداسة البابا ثاوفيلس فى سيدة عايزه تدخل الدير ومعاها هدايا كتير وحراس كتير اعمل ايه معاها؟
البابا :خليها تدخل ياابنى




(تدخل سيدة بملابس انيقة ومحترمة وتقبل يد البابا)
السيدة لارية:انا السيدة لارية من روما وجيت هنا مصر علشان بحب زيارة الاباء القديسين واخد بركتهم وعلشان كده كنت عايزة اشوف الانبا لرسايوس

البابا:انتى بطلبى طلب صعب اوى يا بنتى .لان الانبا ارسانيوس مش بيحب يقابل زوار بس هو اكيد عارف بتعبك وسفرك
واحنا هنصلى من اجلك
السيدة:لكن انا واثقه فى ربنا انى هقدر اشوف الملاكده واخد بركته
(وفى هذا الوقت يخرج ارسانى من قلايته ويقابل السيدة بالصدفة)
البابا:كويس انك جيت دلوقى يا ارسانيوس لان السيده لاريه كانت عايزة تاخد بركتك
(تركع لارية امامهم)
ارسانى :لو سمحتى قومى . اسفتى ايه دلوقتى لما شفتينى "لاينظر لها"
السيدة: يا ابى انا كنت عايزة بركتكم بس "وجهها فى الارض"
ارسانى :لما تشوفى اعمال خير اتعلمى انك تعملى زيها مش تدورى على مين اللى عملها وبعدين وجودك هنا فى الدير مش
لايق.
السيده: انا اسفة يا ابى بس صلى من اجلى...... طيب استاذن انا بقى يا قداسة البابا "تقبل يديه وتخرج"
البابا: ربنا معاك ويباركك يا بنتى "مشيرا بعلامة الصليب ثم يخرج"
المرشدة: ومرت السنين وفى يوم كان القديس ارسانيوس تعبان جدا واخواته الرهبان اخذوه عندهم علشان يهتموا به
(يدخل راهب3 ويسند الانبا ارسانيوس ويقوم باجلاسه على الارض نائم على فرشة وتحته مخده)
راهب3:تعالى يا انبا ارسانيوس علشان ترتاح هنا
ارسانى: شكرا يا ابنى
(يدخل راهب ويلقى نظرة استغراب)
راهب4هو فى ايه يا اخى الانبا ارسانيوس نايم كده ليه؟
راهب3ك فىالحقيقة الانبا ارسانيوس تعبان شويه فجبناه هنا وحطتاه فرشة نظيفة ومخده علشان يرتاح شويه
راهب4: لكن ده كتير اوى بالنسبه لراهب "يقول وهو مستكتر الامر على ارسانى"
راهب3: يا اخى انت كنت بتعمل ايةه قبل ما تبقى راهب؟وكنت عايش ازاى؟
راهب4ك كنت برعى الاغنام وكانت حياتى سلسله من التعب والشقى واتبهدلت كتير اوى
راهب 3: طب دلوقتى انت عايش ازاى بعدما ترهبنت؟
راهب4:دلوقتى انا حياتى احسن كتير .كل حاجة موجودة فى قلايتى واكتر ممااحتاج كمان
راهب3 : طب شوف بقى حال الانبا ارسانيوس قبل الرهبنة . الانسان ده كان معلم للموك وكان بيلبس الحرير والدهب وغير
كده من الاحجار الكريمه . وكان عنده خيول وخدامين وعبيد كتير ودلوقتى الانبا ارسانيوس محروم من كل الحاجات
اللى كان بيتمتع بيها فى العالم . فهو دلوقتى بيعانى فى حياته وانت مرتاح و حياتك احسن من الاول مش كده وايه؟
راهب4: صلى لى يا اخى علشان انا غلطت فى حق القديس العظيم ده اللى ساب كل مجد العالم علشان محبه المسيح
(يطفئ النور ثم يضاء ليدل على يوم جديد)
"يدخل راهب1،2،راهب تحت الاختبار على ارسانيوس وهو نائم"
يقول الثلاثة معا:سلام يا ابانا
ارسانى: سلام ونعمة يا اخواتى
تحت الاختبار: احنا كنا جايين نسمع منك كلمة منفعة يا ابى
ارسانى:كان فى مره راهب ربنا جاب له فكره...انه يخرج يتأمل فى الطبيعه فشاف واحد بيشيل حطب ثقيل ومش قادر يشيله ومع ذلك عمال يزود الحمل وبرده مش عارف يشيل

راهب2:وايه تفسير الكلام ده؟
ارسانى شيال الحطب هو انسان خطاياه كتيره وبدل مايتوب ويعترف بيشيل خطايا فوق خطاياه
راهب 1:ممكن تقول لنا حاجه كمان يا انبا ارسانيوس
ارساني: فى اتنين راكبين حصانين وشايلين عمود بعرض الطريق فمعرفوش يدخلوا من الباب
راهب2:انا بتقول حاجات تحير العقل ياانبا ارسانيوس
ارسانى:الاتنين اللى شايلين هم ناس بتخدم ربنا لكن معندهاش تواضع ومحبه لبعض وعلشان كده مش هيعرفوا يدخلوا ملكوت السموات

تحت الاختبار: احنا لسه مشبعناش من كلامك يا انبا ارسانيوس


ارسانى: فى واحد كان عطشان وكان واقف جنب بير وكان فى كوباية مخرومة جنب البير فحاول اكتر من مرة يمد الكوباية
المخرومة فى الميه علشان يشرب لكن دايما كانت بتطلع فاضيه ففضل عطشان
راهب2:ممكن توضح لنا المثل ده اكترمن كده
ارسانى: الراجل العطشان هو اى انسان بيعمل صدقة من ظلم الناس فيضيع عمله وكأنه معملش اى خير
راهب1:احنا تعبناك اوى النهاردة يا انبا ارسانيوس نسيبك بقى علشان ترتاح
راهب2:بس احنا مبسوطين من كلامك وفرحنين به
تحت الاختبار:طيب ممكن كلمة اخيرة قبل ما نمشى
ارسانى:كتير الةاحد بيتكلم ويندم على كلامه لكن السكوت مش مكن نندم عليه ابدا
(يخرج الرهبان ثم يدخل راهب 5 وفى هذا الوقت يقرا ارسانى الانجيل)
ارسانى:والمجد لله دائما
راهب5:سلام يا ابى
ارسانى:سلام ونعمه يا بنى اتفضل ارتاح
راهب5:يا ابى انا الشيطان بيحاربنى فى سر الافخارستيا. انا بقيت بشك فى السر ده ومش مصدق انه جسد الرب ودمه
ارسانى: ازاى يابنى تقول الكلام ده دا السيد المسيح بنفسه هو اللى اسس السر ده وقال "خذوا كلوا هذا هو جسدى وكمان قال خذوا اشربوا هذا هو دمى الذى يسفك عنكم وكمان هو اللى قال ان جسدى مأكل حق ودمى مشرب حق من يأكل جسدى ويشرب دمى يثبت فى وانا فيه

راهب5:انا مش قادر اهرب من الشك يا ابى
ارسانى: ربنا يقوى ايمانك يابنى وعموما بكره الاحد . ياريت تحضر القداس وانا هصلى علشان ربنا يرفع عنك التجربة
ارسانى: يارب نور عينين اخويا وارفع عنه يارب تجربه الشك فيك يارب بشفاعه جميع مصاف قديسيك استجيب صلاتى امين
(يخرج وتطفئ الانوار ثم يعود وتضاء الانوار مرة اخرى)
راهب5: ياانبا ارسانيوس انا حضرت القداس وربنا فتح عينى وشفت منظر جميل جدا انا شفت طفل جميل .مشفتش اجمل منه كان موجود فى الصينيه والكلام ده كان ساعة تقديس الخبز والخمر انا مش ممكن اشك تانى فى جسد ودم السيد المسيح
انا بشكر ربنا اه شال الشك من قلبى .شكرا ليك يا انبا ارسانيوس (يخرج) وتغلق الستار
المرشدة: وقربت ساعة انتقال الانبا ارسانيوس من العالم وكان معاه مجموعة رهبان وكان عمره فى الوقت ده حوالى 95سنة
(تفتح الستار على ارسانى عجوز جدا ومعه مجمموعة رهبان)
ارسانى :يا اولادى وقت مرواحى للسما قرب وانا بوصيكم انكم متهتموش إلابخلاص نفوسكم ومش عايزكم تخافوا .انا هقول لكم على الوقت لما يجى ميعاد الرحيل وبعد رحيلى بطلب منكم طلب انكم تربطوا رجلى بحبل وتجرونى عند الجبل وتحطونى فى المكان اللى هينقطع فبه الحبل وتدفنونى هناك
تحت الاختبار:طيب ياريت تقول لنا نصيحة تساعدنا فى رحلتنا على الارض
ارسانى: لازم تكونوا مؤمنين باللهمن كل قلبكم ولازم يكون عندكم صبر على كل محنة واحسنوا لكل المسيئين اليكم وقدموا الرحمة لجميع الناس وكونوا مبطئين فى الغضب وخليكوا واثقين دايما فى ربنا انه هو اللى بيدبر حياتنا
للصالح ومحدش يسيب الصلاه من لسانه ويكسل عنها علشان الغربان متعشش على رؤوسكم انا قصدى الشيطان طبعا
راهب5: انت خايف يا انبا ارسانيوي من الموت
ارسانى:وقت رحيلى قرب جدا فمتخفوش ...انا من يوم ما دخلت الرهبنه وانا خايف من اللحظه دى يا ترى انا رضيت ربنا بأعمالى ولاكنت عبد بطال لسيده ....."تعالى يا حبيبى يسوع بسرعة"(يرشم نفسه بعلامة الصليب ثم يفارق الحياه )
تغلق الستارة البيضاء
المرشدة:ودى كانت حكايه القديس العظيم الانبا ارسانيوس معلم اولاد الملوك اللى تنيح فى يوم 8مايو الموافق 13 بشنس بركة صلاتة تكون معانا. دلوقتى بقى ايه رايكم فى حكايته؟
بنت1:حكايته حلوة جدا مليانة بمحبة ربنا يسوع المسيح
بنت2:وشفنا فيها عمل الله غى قلوب البشر
بنت3:لما يغير حياته ويرضى يعيش غلبان بيحب السيد المسيح
بنت4:وكانت حياته مثال لكل انسان بيحب الهدوء والسلام
بنت5:شكرا على الرحلة الجميلة دى .انا مبسوطة اوى .يلا يا جماعة احنا اتاخرنا اوى على ميعاد الاو توبيس .وكل رحلة وانتم طيبين (وتغلق الستارة الكبيرة)