واعطيتنا سلطان ان ندوسالحيات و العقارب

واعطيتنا السلطان ان ندوس الحيات والعقارب وكل قوه العدو
من صلاه الشكر
لو قرينا سوا في اول ايه في انجيل معلمنا لوقا الاصحاح التاسع نلاقيه بيقول
ودعا تلاميذه الاثني عشر واعطاهم قوه وسلطان علي جميع الشياطين وشفاء امراض
يعني معني كده ان ربنا ادي للتلاميذ سلطان علي اللارواح النجسه والامراض طيب نقرا في نفس الاصحاح بس في ايه رقم 38 يقول كده
واذا رجل من الجمع صرخ قائلا يا معلم اطلب اليك انظر الي ابني فانه وحيد لي وها روح ياخذه فيصرخ بغته فيصرعه مزبدا وبالجهد يفارقه مرضضا ايه وطلبت من تلاميذك ان يخرجوه فلم يقدروا
طب ازاي يحصل الكلام ده ده ربنا يسوع بنفسه اداهم سلطان علي الارواح النجسه وفي نص الاصحاح يقول انهم راحوا اماكن تانيه يبشروا ورجعوا مبسوطين لان الارواح الشريره بتخضع ليهم يبقي ازاي هما مش قادرين دلوقتي يخرجو الروح النجس اللي جوه الولد ده ايه اللي حصل؟؟؟؟؟؟؟؟
اللي حصل حاجه واحده بس ان التلاميذ في الوقت ده كانوا مشغولين بثلاث حاجات تانيه احيانا كل واحد منا بينشغل بيها بردو وبسببها بنفقد سلطاننا اللي المسيح مديهولنا لاننا ولاد ملك فلينا سلطان الملك
طب ايه هي الحاجات اللي انشغل بيها التلاميذ فافقدتهم سلطانهم؟؟؟؟؟؟؟؟
اولا الانشغال بالذات والبر الذاتي
هنلاقي في نفس الاصحاح في ايه 46 يقول كده
وداخلهم فكر من عسي ان يكون اعظم فيهم
احيانا كتير احنا بردو بنقعد نفكر مين فينا احسن وليه ده يبقي احسن مني وابونا يستامنه وانا لا وليه ده يمسك كل حاجه في الكنيسه والخدمه وانا لاهو احسن مني في ايه ولو اخدنا بالنا ان كل ده بذور من الشيطان بيرميهالي علشان بيها يفقدني سلطاني عليه فيقدر يدخل لي بقوه وطبعا كلنا عارفين ان ده معناه انه فكر دينونه ولكن المحبه الحقيقيه تخلينا ننتصر علي كل ده
ثانياالشلليه والتحزبات داخل الكنيسه
بمعني التقوقع حول الذات ومهاجمه اي حد مش تبعنا
وده باين اوي في نفس الاصحاح ايه 49 يقول كده
فاجاب يوحنا وقال يا معلم راينا واحدا يخرج الشياطين باسمك فمنعناه لانه ليس يتبع معنا
يعني انت يا يوحنا انت والتلاميذ لا ترحموا ولا تخلوا رحمه ربنا تنزل طب انتوا مش قادرين تخرجوا الروح النجس كمان لما تلاقوا حد بيخرج باسم ربنا تمنعوه يااااااااااااه
مش التلاميذ بس اللي عملوا كده احنا كمان كل يوم بنعمل كده جوه الخدمه والكنيسه لمجرد انه مش تبعنا نمنعه من عمل الخير لانه لو تبعنا المجد هيتنسبلنا كلنا لكن ده غريب مش تبعنا ازاي يعمل اللي المفروض نعمله لا ده كده يسرق مجدنا
مش هو ده اللي احنا كلنا بنعمله كل يوم وفي الاخر الضحيه مين؟؟؟؟؟؟ ولاد ربنا المخدومين
ثالثا طلب الانتقام والتشفي في مصايب الغير
بمعني ان كل واحد فينا يطلب الشر للي حواليه في صلاته هو طبعا ربنا مش بيستجيب للشر بس بردو غلط اننا نطلب الشر في صلاتنا والكلام ده باين بردو في نفس الاصحاح ايه رقم54 اللي بتقول
فلما راي ذلك تلميذاه يعقوب ويوحنا قالا يارب اتريدان نقول ان تنزل نار من السماء فتفنيهم كما فعل ايليا ايضا
احنا كمان ساعات كتير بنطلب من ربنا انه يضر الناس لمجرد انهم تعبونا او ضرونا في اي شيئ وبننسي ان ربنا طلب مننا نكون متسامحين وزي ما علمنا في الصلاه الربانيه اننا نقول
واغفر لنا ذنوبنا كما نغفر نحن ايضا للمذنبين الينا
وربنا قالنا احبوا اعدائكم باركوا لاعنيكم احسنوا الي مبغضيكم وصلوا لاجل الذين يسيئون اليكم ويطردونكم
وهي دي الثلاث حاجات اللي بيها الشيطان بيضحك علي ولاد ربنا ويخليهم يقعوا فيها فيفقدوا سلطانهم عليه زي ما حصل مع التلاميذ زمان وزي ما بيحصل مع كل واحد فينا دلوقتي
اذكروني في صلاتكم