قصيدة فتاة في ليلة عرس حبيبها

قصيدة فتاة في ليلة عرس حبيبها، تقول فيها :

جاني الخبر يا صاحبي واظلم الكون ..
قدام عيني ثم نطقت الشهاده ..

على العموم أقولها ألف مليون..
مبروك من قلب شكالك ابعاده..

مبروك لا يهمّك سواليف وضنون..
من عاشق يهديك فرحة فؤاده..

سوّ الفرح اليوم وابليس ملعون..
واللي يشب النار يجني رماده..

أنا أول العالم على القصر يلفّون..
أول معازيم الفرح والحداده..

أبشر أنا برقص على العرس بالهون..
كل يعبر فرحته باجتهاده..

لو البلا رقصي يقولون مزيون..
المشكلة القلب يفضح وداده..

يوم العذارى في دخولك يغنّون..
وعروستك بأحلى ثواني السعاده..

كنت أتمنى بدالها والله أكون..
وأحطّ أنا كفي تحت راسك وساده..

واشلون بكتم صرختي يوم تمشون..
تكفى ..خذني للعروسه قلاده..

حتى معازيم الفرح قامو يمشون..
وأصبحت أنا وحدي بدون استفاده..

وطفّو عليّ النور من غير يدرون..
قصر الفرح يا قبري أنا وزيادة..

وصيتي لو جاك بنت وأنا أمون..
سميتها على اسمي من قبل الولاده..